《印度 · 尋油 · 台灣妹》: 《三十》

計一計，今次失憶印度之旅响數字上都好可怕，機票連酒店原來用咗成皮野，唔知幾時又叫咗家姐匯幾千蚊，我同佢講我完全無印象，問佢會唔會遇到補藥黨，佢無我咁好氣，簡單一句唔還性無能，兩姊弟又唔駛咁毒嘅！ 


好彩有買保險，入住醫院已經唔駛自己拔槍，不過最傷嘅就係唔見咗 "三叔"，我新買嘅 "三叔篤屎三" 電話。 


今時今日，無咗部電話喺手，係會有蟻咬㗎，有財赤困難嘅我，只好用番部舊機，落樓下出番張卡，插番落部機，一開，唔 ~ 乜都無晒，重新入過。 


唔留底同唔著底一樣咁麻煩，無晒啲相事少，搵過晒啲電話事大，又要搵又要入，咁就用咗兩個鐘，離港至今都有六日，睇下有無人搵過我先。 




「你有七個留言訊息 」


新口訊，收到日期係 十一月二十一日 :「趙生，呢度係扯旗銀行打比你 ……」 


經已删除，下一個口訊，收到日期係 十一月二十一日 :「死仔，阿謙啊，幾時得閒食飯？得就打比我啦！」 




經已删除，下一個口訊 : 收到日期係 十一月二十三日 :「Hi …… 是我，我沒有回台灣，我決定留多兩天，現在已回到酒店，找了你很久也找不到你，很想念你，你去了那？」


經已儲存，下一個口訊，收到日期係 十一月二十四日 :「我還在酒店，為什麼昨天你沒有回來？你可好嗎？我等著你！」 


經已儲存， 下一個口訊，收到日期係 十一月二十五日 :「嗚 …… 嗚，我 …… 現在回台灣，你 …… 你為什麼要救我，為什麼你會不記得我，為什麼？？嗚嗚 ……」 




經已儲存，下一個口訊，收到日期係今日 :「嗚嗚 …… 你 …… 現在怎麼樣？好點嗎？還記得我嗎？我是 Priscilla，我 ...... 們再會見面嗎？」 


經已儲存，下一個口訊，收到日期係今日 :「達仔，大鳥啊，番咗嚟未吖？有無幫我買野？番嚟 call 我啦！」 


經已删除，你再無新嘅留言 …… 


聽完所有訊息之後，我呆呆地揸住個電話，之後再一次聽番 Priscilla 嘅留言，真係如家姐所料，我係因為佢而比車撞，尋晚個夢亦可能係真，但係知道又點，我一日記唔番，就係一日記唔番，感情唔可以用錢買，更加唔能夠施捨，對唔住，Priscilla ……


「達仔，食飯喇！」媽子大嗌 




「收到，出嚟！」 


「差唔多成個禮拜無見你，個人瘦晒，快啲飲碗湯先！」媽子啱啱由廚房出嚟，除低圍裙 


「世~上~只~有~媽~子~好，有~媽~的~孩~子~像~個~寶 ……」為咗歌頌母親嘅偉大，我即席歌起唱 


「夠喇，仲玩，係呢，頭先幫你執番啲污漕衫褲出嚟洗，見到有幾份禮物，放咗响梳化度！」 


「哦，我都唔記得係咩，等陣睇下先！」我一邊飲湯，一邊食緊件雞 




「駛唔駛食得咁急吖，慢慢食，食嘢係一種享受嚟㗎！」老豆見到我個食相，忍唔住就話 


「咪係囉，狼吞虎嚥咁，個樣真係衰到無人有！」家姐毫不留情咁踩埋嚟 


跟住成家一齊笑起上嚟！哈哈哈哈 …… 


食完飯，去咗梳化坐，望住呢幾件嘢，兩包茶葉、三條圍巾同一支野，雖然無乜印象，但係唔難解決。 


茶葉，一定係買比老豆㗎啦，間唔中都要扮下孝順仔嘅！ 




圍巾，正路呢，海綠色係買比媽子嘅，襯上身成個人後生晒，橙色一定係家姐，佢至愛，棗紅色 …… 呢？點解會買第三條嘅？ 


至於呢支黑色唔知乜叉嘢噴樽，無包裝，無說明書，唔 ~ 前面印有兩隻馬，跟住個名係 ST兩隻馬D，唔 ~ 下面寫住 "FEEL THE HE-MAN IN YOU"，唔 ~ 有意思，有態度，好明顯呢支係止汗噴霧啦，細細支易收藏，比埋老豆，佢咁大汗，啱晒！


乜都解決晒，人人有份，果條棗紅色圍巾 …… 就放埋一邊度先。