《天堂之上 - Upon The Heaven》: 第六集: 晚飯
澄媽兩手拿著一袋二袋的戰利品，騰不開手開門，於是阿澄便替媽媽開門。進屋後，她們將貨物放在飯桌旁，依著桌子的腳，阿偉也幫忙清空飯桌的另一邊放置袋子。放下重擔後，澄媽倒在沙發上，好像累了一天，全身沒有氣力一樣。阿澄在媽媽買來的袋子裡找找，看看有沒有東西是專誠買給自己的。
「媽咪，你買咗咁多嘢有冇我份架？」阿澄邊找邊說。
「買咗件衫同埋化妝品俾你，」澄媽立刻坐起來說道。「件衫係一年前嘅款，不過呢宜家仲好靚架，最緊要係……今日個老闆唔知做咩，居然三折大平賣喎……係三折呀﹗仲有，呢堆化妝品都係你嘅。最緊要係呢支卸妝水，隔離屋個女阿雯介紹嘅，佢話幾好用喎，用嚟落妝可以保養返皮膚，你知你成日出去玩化妝化到鬼五馬六……」澄媽一口氣說了一大段說話。
「哇，睇你開心到個樣，似乎今日最大收獲係你喎…」阿澄笑笑，找到了澄媽袋子裡的一件衣服。「你睇下，呢件衫…直程襯到我媽咪絕一絕呀。」
「係呀？你都係咁覺得呀？我都覺得呢件衫著得我，好似後生咗幾年咁樣，個店員仲讚我保養得好呀，佢話我睇落似二十尾咋……哈哈」澄媽拿著那件衣服炫耀起來。
「係啦係啦，我媽咪最靚喇。」阿澄搭著媽媽的肩膀說。「靚女，咁幾時有飯食呀，連我肚仔都識叫你喇宜家。」阿澄捂著肚子說。
「好啦，媽咪今晚心情好，整啲好餸你食呀！」澄媽雀躍地說。「阿偉呀，咁你哋休息下先，好快有得食。」
「唔該澄媽。」阿偉答道。
「你自己坐下啦咁。」阿澄漫不經心地對阿偉說。
接著阿澄便上樓梯，回到了自己的房間，收藏著剛才媽媽送給她的東西。阿偉坐了坐，又起來走走。不經意地，又走到了莊園，他坐在長椅上，望著遠方的山巒、河流以及幾縷炊煙，心裡又記掛起他的家人和朋友。
「唔知阿爸阿媽宜家點呢。」阿偉心想。「媽，俾我再見到你一面啦，好唔好？」
「偉仔！」偉媽從昏迷中甦醒過來，用全身的力氣叫著兒子，但聲音也十分沙啞。
「老婆，你終於醒返啦，謝天謝地！」偉爸驚喜地說著。「阿聲，快啲叫醫生！」
「阿偉，你喺邊呀？」偉媽用微弱的聲線叫著。「阿仔頭先叫我呀，阿偉…」
「你瞓返低先，唔好咁激動啦，乖！」偉爸說道。
阿聲急忙步出房間，找到了醫生。醫生立刻到了偉媽的病房，替她檢查一番。眾人都在旁邊陪伴偉媽。
「病人佢因為過度受驚，引致心臟負荷過重，先至會突然之間昏迷姐，而家佢醒返，休息下，唔好亂諗嘢，情況許可就可以出院架啦。」醫生對偉爸說。
「你記得要休息多啲，咩都唔洗理，專心養病，仲有唔可以太過粗勞，咁幾日後就可以返屋企架啦。」醫生心平氣和地對偉媽說。
安頓好偉媽後，醫生與偉爸到門外談了一談偉媽的情況，而阿聲和阿盈就留在房間內陪伴偉媽。
「病人嘅情況頭先講咗你聽啦，記得唔好俾佢再受刺激，如果唔係就會好大件事架啦。總之一個字，關懷、關心、呵護，愛！」醫生語重心長對偉爸說。「係喇，仲有……」
「明架喇，醫生，我會好好照顧佢架喇。」偉爸急不及待地說道。
偉爸之後回到病房，坐在偉媽身旁。
「阿盈，點呀，有無阿偉消息呀？搵唔搵到佢呀？」偉媽坐起來問。
「暫時…未有…不過我哋會繼續搵佢架啦，放心啦。你要小心身體，照顧好自己呀，如果唔係阿偉返嚟見到你咁樣，佢會好唔開心架。」阿盈說。「咁啦，我哋出去買啲嘢食返嚟，你幾日都無食過嘢喇，睇下你塊面都瘦曬喇，點都食少少嘢先啦。」
說罷，阿盈和阿聲便離開了醫院到附近的餐廳，尋找一些適合偉媽及偉爸吃的東西，阿盈沿途也沒有多說話，只是在東張西望，彷彿希望快點找到那間餐廳，也可能是缺少了阿偉在旁，阿盈不知道該說些甚麼。
「阿盈，你冇嘢呀嘛？」阿聲細聲地問。「其實唔使行咁快嘅…睇車呀！」
阿盈差點被小巴撞倒，幸好阿聲拉著她。
「阿聲，多謝你呀，如果唔係…我都唔知點樣捱落去…總之…」阿盈說道。
「傻啦，我哋係好朋友嚟架嘛，阿偉嘅事…一於交俾我啦，我會盡力睇下有咩方法搵到阿偉架喇。你睇下你，個樣殘曬喇，幾多日無瞓過教呀？」阿聲看著阿盈的眼睛，輕聲說著。
阿盈舉起了三隻手指，伴隨著一絲苦笑與失落。
「咪係囉，再係咁落去呀，阿偉返到嚟都唔認得你喇。」阿聲說。「一陣陪阿偉父母食埋餐飯，你就返屋企抖下啦，唔使太擔心，我會搞掂架喇。」
阿盈點點頭，呼了一口大氣，她也意識到自己的身體開始負荷不來，是應該依照阿聲所說，回家休息一會兒。走著走著，兩人便到了一間茶餐廳面前，看看門外的餐牌。餐牌上有著不同的餐點，配合著色彩鮮艷的食物圖片，看來令人食指大動，垂涎三尺。二人卻似乎不為所動，因為這麼濃味的菜餚看來並不適合病人食用，於是二人便詢問店員，看看有沒有一些清淡的食物。經過考慮後，二人選擇了瑤柱瘦肉粥和兩味清淡的小菜，便回程往醫院慢慢走著。
「偉爸，偉媽，我哋買咗啲嘢食返嚟喇，你哋都食啲啦，清清地應該啱你哋食嘅。」阿聲說著。
接著阿盈和阿聲便打開了外賣盒子，將餸菜放在房間櫃子上的空位上，並且將瘦肉粥端到了偉媽病床上的桌子上。
「偉媽，呢個係瑤柱瘦肉粥嚟架，你應該啱食架。」阿盈對偉媽說。
「你哋都食啲啦，咁多我哋食唔曬，又小菜又湯又飯咁樣，唔好曬嘢嘛。」偉媽說。
「咁……好啦，我哋食少少啦。」阿盈說。
偉爸替偉媽打開蓋子，一口一口的餵著偉媽，而阿盈和阿聲也吃了一點其他菜餚。
「阿偉，食得喇，你坐喺出面做咩呀，入嚟食飯啦。」澄媽叫著。
「得喇，我宜家嚟。」阿偉說。
阿偉進了飯廳後，看見飯桌上擺放著五道菜，一大鍋湯，真是非常豐富。阿澄已經拿著筷子，準備第一時間開動她的「饞食模式」，澄媽也端出飯煲，替阿澄和阿偉盛飯。阿澄一接過飯碗，便不等待媽媽和阿偉，開始吃起來。
「阿澄！你個為食女呀，次次都係咁，唔等其他人自己食先。」澄媽教訓著阿澄。
「唔緊要啦，佢都係肚餓姐。」阿偉替阿澄說話。
「好喇，食飯啦，阿偉，唔使太客氣架。」澄媽說。
「天冰哥呢，唔使等佢返嚟？」阿偉問。
「佢今晚有啲嘢做唔返嚟食喇。」澄媽答。
「係呀，我爸爸成日都開OT架啦。」阿澄補充。
「你哋呢度都興加班架？我以為淨係香港人先要成日開OT添。」阿偉驚奇地說。
「唔知爸爸媽媽宜家點呢，食左飯未呢？我真係好想見到佢地……」阿偉心想。
「做咩呀阿偉，快啲食嘢啦，凍咗就唔好食架啦。」澄媽說。
「哦，知道。」阿偉說。