《天堂之上 - Upon The Heaven》: 第五集: 慶典
阿偉帶著阿澄的狗仔到了莊園，開始從水井裡一桶一桶的將水打出來，阿澄的狗仔似乎十分聽話，沒有反抗，好像感覺到阿偉沒有惡意，於是阿偉便放心地幫牠沖涼，這時阿澄也跟了出來。
「係呢，佢叫咩名呀？」阿偉指著小狗問阿澄。
「佢叫波比，因為佢成個波咁漲噗噗。」阿澄天真爛漫的笑著。
阿偉拿起毛巾，刷著波比的身體，波比甩了甩身體，弄濕了阿偉的衣服，阿澄便向前幫手捉住波比，但波比甩得更厲害，好像要跟阿偉和阿澄玩一樣，甩出來的水珠也弄濕了阿澄的上衣。
「你個波比呀，平時又唔見你咁活潑，今日又整到我成身濕曬。」阿澄說。
於是阿偉就笨笨拙拙的刷著波比的身體，阿澄幫忙捉著它，波比不時反擊，甩一甩身體，弄得水花四濺，再次弄濕了兩人的衣服。如是者，阿偉在阿澄的協助下，成功完成了他在晴空之城的第一個任務，比起到太空做任務，這個就相對容易。
「你哋玩咩嚟呀，玩到成身濕曬架。」澄媽問。
「波比今日唔聽話呀，成日郁嚟郁去，搞到我哋成身濕曬。」阿澄說。
「阿澄，返入去換件衫先啦，一陣我哋要出去呀。」澄媽說。
「出去邊呀？」阿澄彷彿在替波比洗澡後忘記了甚麼事。
「今日係國王生日呀，又唔記得。快啲入房換件衫啦。」澄媽催促著。
「得得。」阿澄上樓回自己房間。
「阿偉呀，你就住呢度啦，」澄媽帶阿偉走到了客房「我拎咗啲衫俾你呀，係天冰嘅，不過好似大件咗啲喎。」
「唔緊要啦，我搵件冇咁大嘅睇下，唔該曬。」阿偉有禮貌地回應澄媽。
「天冰？」阿偉輕聲問，但澄媽彷彿沒有聽到。
「係喇，一陣我哋去參加國王生日慶典，你同我哋一齊嚟啦，一齊玩下。」澄媽邀請阿偉。
「…咁呀…」阿偉吞吞吐吐地說。
「做咩呀，有咩唔怕同我講呀。」澄媽對阿偉說。
「冇嘢。咁好啦。」阿偉回答。
阿偉一邊換衫，一邊想著父母﹑阿盈阿聲和他的朋友，不知道他們現在如何，定必非常擔心自己，但現在自己無法向他們報平安，也沒法與他們通話。離開，更似是天方夜潭。換好衫，阿偉便到客廳坐著，等待阿澄和澄媽，順便欣賞一下屋內的雕飾和擺設。
「阿偉，好啦，行得。」澄媽說。
「天冰哥呢，佢去咗邊？」阿偉問。
「佢要返工嘛，佢夜晚先至返嚟。」澄媽回答。
澄媽拿著草編手袋，牽著阿澄，走到屋外，阿偉跟在後面。
「澄媽，你哋唔洗鎖門嘅？」阿偉問。
「唔使，我哋呢度個個都識大家，相處都好和諧，就好似一家人咁，放心啦。」澄媽答。
於是澄媽一行人就出發往巡遊隊伍走去。沿途的路人都十分熱情，互相打招呼。這天的天氣十分和暖，雖然正值十一月，但在太陽照射下，一點寒意也沒有。經過市集，抵達大街後，澄媽一行人追上了巡遊尾段的隊伍，澄媽和阿澄便跟著巡遊隊伍唱起歌來，歌頌國王。阿偉這刻也被這種歡樂氣息所感染，也學習唱起上來，雖然不知道歌詞。
「阿澄，呢度啲人真係好歡樂呀，我好耐都未試過咁開心啦，好似將所有壓力同煩惱一次過忘記曬一樣。」阿偉對阿澄說。
「我唔知喎，咁開心呢樣嘢好難形容出嚟，係呢，你哋香港嘅生活係點架？」阿澄問。
「我哋就冇呢度嘅人咁幸福喇。我哋細細個就要讀書補習，又要考試，畢業出到黎又要去搵工搵錢養家，日日就淨係番工，放工，冇咩時間出去參加一啲咁大型嘅活動。假期有時都要返工架，而且又要抽時間休息，你知啦，日日都工作好攰架。仲有呀，我哋住嘅地方好細，邊有你哋呢度咁寬敞。」阿偉好像埋怨著。
「哇，原來呢個世界有人係咁慘架。」阿澄驚訝地說。
「終於有人明白我講嘅嘢喇。你爸爸我同佢講咩佢都唔明白咁嘅。總之呢度就好過我哋太多倍喇。」阿偉再說。
「聽落我哋呢度又真係好好多喎。」阿澄笑笑說。「咁又係，呢度唔止環境靚，空氣好，仲有呀，我哋好多嘢都係自給自足架。」
「自給自足咁叻？」阿偉好奇地問。
「係呀，我哋自己種菜種瓜，水就係井或者河流拎，我哋屋企後面咪有一大片田地用嚟種嘢架囉，呢啲你要知架，遲啲你要幫手…仲有我哋國家成日會種樹架，所以周圍都係綠色植物。」阿澄說。
阿偉與阿澄聊著，巡遊隊伍到達了終點站「沙巴利亞公園」，這是以女王命名，全國最大的公園。澄媽﹑阿澄帶著阿偉一起在公園內遊玩，公園的周圍充斥著許多街頭表演者，有的在唱歌跳舞，有的在玩雜耍，有的在擺攤替人算命，有的更在表演武術。而在公園內，更有許多的攤位遊戲，扔皮球，跳跳棋，好像真人版的大富翁遊戲，還有禮物換領呢﹗公園中央有一座巨型的噴水池，中間是國王和女王的雕像，大約有兩層樓高，兩人手拉著手，旁邊有兩條類似龍的動物雕像，兩條晶瑩的水柱各自在兩條龍的口中噴出，在陽光的閃耀下，整個建設閃閃生輝。澄媽撥開擠擁的人潮，帶著阿偉與阿澄走到了其中一個攤位玩遊戲。
「你哋玩住呢個先啦，呢個攤位好好玩架，又易嬴獎品喎。」澄媽興奮地說。
說完，澄媽的影子便被人羣所遮掩，好像她有甚麼任務在身似的，向著市集走去。幸好這個攤位，排隊等待的人不算多，一邊等的阿偉和阿澄，一邊看看規則和研究策略。等了八分鐘，終於輪到兩人。
「我扔先！」阿澄十分踴躍。
阿澄拿起一個木球，瞄準著她的目標---木板上「10分」的袋子。
「唏！」阿澄將球扔出。
「嘭！」球飛進了2分的袋子中。
「唉呀，得2分﹗」阿澄失望地說。
「到我啦，睇嘢﹗」阿偉自信地說，然後將木球對準10分的袋子。
「十呀！」阿偉將球扔出去。
「嘭﹗的…的……」球彈在5分袋子的框上，然後慢慢彈到地下。
「唓，乜你咁渣架，叫你扔個波落個袋度，你扔落地下都有嘅…」阿澄取笑著阿偉。
「你咪又係得2分，話我喎！」阿偉反擊。
「好，0分，」主持人說「你哋總分係2分，呢個係你哋嘅禮物。」
「嘩，咩嚟架？」阿偉問。
「呢啲係我哋嘅特色飲品，叫甘草茶，好好飲架。」阿澄將其中一杯遞給阿偉。
阿偉舉起杯子，嚐了嚐它的味道。
「好似幾好味咁喎，涼涼地，又唔係好甜，今日咁大太陽，飲咗真係舒服咗啲，好清新。」阿偉邊喝邊說。
「好啦，我哋去玩第二個攤位囉﹗」阿澄說。
阿澄帶阿偉差不多遊遍公園裡大大小小的攤位，雖然阿偉偶有失手，但二人也嬴取了不少的獎品，多是食物或飲料，也有日用品。他們玩了兩個小時後，到了樹下的草地坐下，打算休息一下，再出去玩。
「你媽咪去咗邊度呀，使唔使搵返佢？」阿偉問。
「唔使啦，佢去咗掃貨，今日市集好多靚嘢。」阿澄心知媽媽的心意。
阿澄抖了兩口大氣之後，看看了那邊的其中一個攤位。
「阿偉，點呀抖夠未？嗰邊好似未去過喎﹗」阿澄盯著那邊的禮物。
「又…嚟呀？」阿偉喘著氣說。
「行啦，快啲！」阿澄立刻站了起來，不等阿偉，自己先走了。
阿澄跑到人群之中，頃刻就不見蹤影。阿偉有些擔心，於是起來到處尋找阿澄。阿偉因不熟悉環境，在公園裡漫無目的地遊蕩著。阿偉逆著人流走去，走到了公園角落裡的小徑。阿偉發現小徑旁豎立著一個又一個人型石像，它們全都拿著武器，面向公園裡國王與女王的雕像。阿偉走近仔細一看，發現石像上的雕刻十分細緻，連人物的眼神及特徵都完美的刻畫到石上，栩栩如生，活靈活現。阿偉上前逐一細看每個石像，正沉醉於欣賞其神態之時，阿澄突然拍一拍阿偉的肩膀，嚇得阿偉跳了起來。
「阿澄？呢度係咩地方？呢啲石像又係咩人嚟架？」阿偉心中有著萬般疑問。
「你點解走過嚟呢度嘅？我頭先見你咁耐都未跟上嚟，就走返去樹下面搵你，你又唔見咗。快啲返入公園啦，我仲有好多攤位未玩！」阿澄完全無視阿偉的問題。
「頭先嗰啲石像係咩人嚟架？」阿偉一邊向公園走回頭，一邊問著同樣問題。
「呢個公園係紀念公園嚟，爸爸喺我六歲嘅時候帶過我嚟，佢話喺好多年前，曾經有一班壞人想入侵晴空之城，全靠一班英雄犧牲自己性命，奮力抵抗敵人，先可以擊退呢一班入侵者。詳細我都唔係好記得喇，或者你有時間問下爸爸啦！」阿澄答。
兩人回到公園內，又再從東逛到西，從外逛到內，直至日落。人羣隨著陽光的消逝而散去，阿偉拿著那一小袋獎品，與阿澄到公園門前等待澄媽。不久，澄媽也找到了兩人，一邊回家，一邊說著今天自己買了甚麼便宜貨，甚麼超值的貨物，直至到家門前。