《天堂之上 - Upon The Heaven》: 第十一集: 朋友
在晴空之城內，這晚，阿偉一直在等待著阿斯的電話，渴望著快點可以工作，或許在工作中可以找到辦法離開，不致於每天在天冰家裡無所事事，家務又有澄媽打理得貼貼服服，阿偉只好每天都到處走走看看。阿偉在他房間內踱來踱去，有時到床上躺一會，有時到窗邊看一會，阿偉留意到這晚的星空特別美麗，尤其是東南邊有一顆特別出眾的星，好像一時在閃爍，一時卻隱藏自己一樣。阿偉觀察了這一顆星星一會兒，身旁的電話便響了。
「阿偉？我係恭晴斯呀。」阿斯說。
「係阿斯呀！我等咗你好耐喇！」阿偉說。
「係呀？我想同你講關於你份工作嘅事，你宜家有冇時間？」阿斯問道。
「有呀有呀，傾幾耐都得。」阿偉開心的說。
「係咁嘅，我之前咪安排咗你去電動車研究嗰邊嘅，嗰邊個主管聯絡咗我喇，佢話隨時歡迎你去上班。我想通知你，聽朝早八點，去呢度返工，地址係……」阿斯通知著阿偉。
「哦，冇問題，我會準時到架喇。唔該你。」阿偉向阿斯道謝。
「咁再見喇。」阿斯掛了電話。
「再見。」阿偉來不及道別。「咁快收線，拜拜都唔俾我講。」
阿偉放下電話，走到窗邊，再望望那顆耀眼的星星。
「今晚真係吉星拱照喇。」阿偉說。
到了另一個早晨，阿偉比平時再早了一個小時起床，打算到洗手間慢慢整理自己的儀容，但洗手間的門緊緊鎖上了，燈光映照下，還有一個人影，看著小小的，好像是阿澄。
「阿大小姐，你喺入面做咩呀，我要用洗手間呀，我要返工呀！」阿偉輕輕地拍著門。
「你唔好嘈啦，我要化妝呀，今日學校搞化妝舞會呀，你唔好阻住啦，我好快架咋…」阿澄說。
「唉，咁你搞掂快啲出嚟啦，我都要用架。」阿偉催促著。
阿偉坐在客廳的沙發上，開著電視看看，播映的都是甚麼天氣報告和新聞報道。阿偉發著呆，傻下傻下的等著阿澄出來，好像還沒有睡醒一樣。過了一個小時阿澄終於出來，她拿著書包，到沙發旁搖搖阿偉。
「喂，阿偉，起身喇！我搞掂喇。」阿澄背起書包說。
「阿盈…？」阿偉睜開惺忪的雙眼。
「型？我今日係幾型嘅，見你咁識做，今晚唔使你幫我執書包啦，你自己慢慢喇，我走先。」阿澄衝出門口。
「宜家幾點呀？嘩，有冇搞錯，化妝化咗成粒鐘！早知唔使咁早起身。」阿偉跌跌撞撞的走向洗手間。
阿偉由頭到腳，由內到外的整理，將自己「執」到好似老闆一樣，穿上西裝，結好領帶，鬚根也剃得貼貼服服，洗了三次面，刷了兩次牙，梳了四次頭，在洗手間內照了十數次鏡子，半個小時後才出來。接著便立刻飛奔到工作地點去，因為只顧整理儀容，忘了時間，快要遲到了。跑著跑著，頭髮又鬆散了，領帶也歪了，真是得不償失。阿偉跑到研究所，立刻進去找他的工作地方。剛好在八時正，阿偉找到了上司，幸好沒有在第一天就遲到。跟著上司的吩咐，阿偉開始第一天的工作，直到午飯時間。
「終於都放飯喇，睇睇今日有咩食先。」阿偉與同事商量著。
阿偉與同事去到了研究所內的餐廳，環境看起來十分舒適、乾淨，座位排列得十分整齊，座位上坐著三三兩兩的研究人員。阿偉與同事隨便找了一張枱，坐下後開始聊聊家常事情，阿偉希望從同事身上了解多一些關於晴空之城的事情。他們差不多吃完飯時，餐廳老闆走過來與客人聊天。
「咦，新同事喎，點呀，啲嘢食好唔好味呀？」老闆問。
「唔錯呀，幾有水準。」阿偉舉起拇指說。「…你係…？」
「我係呢間餐廳嘅老闆，我叫包琛賜，你好。」阿賜與阿偉握握手。
「你個名都幾豪華，你好，我叫陳迪偉，你可以叫我做阿偉。」阿偉說。
「今日第一日返工點呀？」阿賜問。
「幾輕鬆呀，冇咩壓力，同以前嘅工作差唔多，一樣係可以做自己鐘意嘅野，都算幾開心。」阿偉伸伸懶腰。
「開心就好喇，我開呢間餐廳嘅目的就係想我嘅客人，嚟到呢度食嘢可以開開心心，放鬆心情。」阿賜說。
「係呀，你呢度好舒服，坐落好放鬆，都唔願走添。」阿偉說。
「咁你以後多啲落嚟食飯喇！」阿賜笑笑說。
「好呀！同你傾計真係好放鬆，見到你笑，搞到我都想笑埋一份！」阿偉笑了起來。「好喇，係時候返上去做野喇，下次再傾。」
阿偉與同事離開了餐廳，回到研究所繼續工作。他們一邊工作，一邊有講有笑的聊天，阿偉很快便融入了同事的生活當中。在歡笑聲中，不知不覺的便到了傍晚，阿偉與同事一起下班，因為大家不同路，阿偉與大家道別，自己慢慢往天冰家走去。途中，阿偉欣賞著周圍的風景，因為今天早上，阿偉太過匆忙，並沒有留意周邊的景物。原來上班的路旁有一條小溪，好像從遠方的山巒伸延到此。現在一邊緩步沿著小溪走著，一邊眺望遠方的景色，感覺非常輕鬆。
「阿偉，返嚟喇！就嚟食得飯喇，你坐陣先。」澄媽在廚房說著。
「澄媽，有冇嘢要我幫手呀，你出去抖下啦，你咁辛苦。」阿偉走到廚房說。
「你去睇電視啦，我搞得掂架喇，你放工返嚟好攰架，抖下啦。」澄媽輕輕推了阿偉到客廳。
「天冰哥，阿澄未返嚟呀？」阿偉周圍望望。
「佢今日同同學開PARTY，夜啲先返。」天冰坐在沙發上說。
一會兒後，阿偉便與澄媽和天冰一同吃晚飯，席間阿偉分享他工作上的事，澄媽和天冰都放心了少許，因為兩人看到阿偉終於也重新展露出笑容，也一同與阿偉說笑。飯後，天冰與澄媽看了一會兒電視節目後，因為天冰明天要早起，便回到睡房休息，澄媽過了一會也回房休息。夜闌人靜，阿偉想到戶外呼吸新鮮空氣，於是再次走到莊園，躺在草地上看著天空。不久，阿澄也回來了。
「阿爸阿媽，我返嚟喇。」阿澄說。「去咗邊呢，咁早瞓教嘅……係喎，原來都唔早喇喎。」
阿澄到廚房端出了留給她的飯菜，一邊看電視，一邊食飯。飯後，阿澄走到了莊園找她的狗仔波比，打算與波比玩一會。
「波比，你今日乖唔乖呀，有冇聽媽咪話呀？」阿澄對狗仔說。
波比向著阿偉的方向搖著尾巴，好像知道甚麼事一樣。
「阿偉，你喺度做咩呀，做咩唔返房瞓？」阿澄問。
「阿澄？你幾時返嚟架？冇嘢呀，想靜靜地諗下嘢啫。」阿偉對著天空說。
「有咩諗呀？你成日好似好多心事咁嘅。」阿澄與波比坐到阿偉旁邊。
「咦，你未落妝呀…」阿偉看了看阿澄。
「做咩呀，唔好睇咩？波比，你話我靚唔靚呀？」阿澄摸著波比的頭。「嗱，波比話靚囉，好唔好？」
「係喇，最靚係你喇。」阿偉敷衍地說。
「唓，唔理你喇。」阿澄起來帶波比到莊園另一邊走走。
「阿澄呀，你爸爸媽媽真係好，你真係好幸福！」阿偉羨慕的說。「唔好扮聽唔到喎…」
「係呀，我爸爸媽媽對我好好架……做咩冇啦啦咁講？」阿澄問。
「羨慕你囉…」阿偉欲言又止的說。
「係呢，唔見你講你父母嘅？」阿澄問。
阿澄也躺到草地上，望著星空。
「冇呀，我都唔知佢哋喺邊，唔知幾時先可以見得返佢哋……」阿偉嘆息。
「哦，原來係咁樣，唔怪得之你成日都咁唔開心啦。」阿澄恍然大悟，之前都沒有太在意阿偉的事。「唔緊要啦，只要你哋有緣，始終都會再見嘅…」
「我都唔知，我只係好掛住佢哋啫。」阿偉說。「我應承佢哋帶佢哋去旅行，而家都唔知幾時可以兌現嚕。」
阿澄想了一會，好像想到了甚麼。
「你見唔見到嗰兩粒星呀？」阿澄指著左手邊那兩顆星星。「你咪當嗰兩粒星星係你父母，掛住佢哋嗰陣，咪出嚟望下佢哋囉。你見唔見到呀？佢哋宜家都望住你呀！」
波比搖搖屈巴，吠了吠。
「係喎……睇睇下，原來我同父母距離好近架咋！」阿偉放鬆了語氣。「佢哋閃閃下呀，好似聽到我哋講佢咁樣…」
「呀，你諗啲嘢都幾奇怪喎，不過又幾有效。點解你識咁諗嘅？」阿偉問。
「我之前跟住學校去旅行，去到另一個城鎮，掛住爸爸媽媽嘅時候諗出嚟架囉…嗱，我淨係教你一個咋…唔好教其他人呀，有版權架。」阿澄開玩笑地說。
「我知喇。你眼瞓未呀？攰嘅就早啲瞓啦，我冇事架喇。」阿偉說著。
「好啦，咁你同你父母傾下計啦，我唔阻住你喇。」阿澄帶著波比回到屋內。
「記得落妝呀，唔係聽朝我起身嚇死我呀。」阿偉笑著說。
「哈，你顧掂你自己先啦…」阿澄弄了個鬼臉。