「唔該何SIR。依度仲有上個月興展堂的洗錢紀錄。」招卓行遞上USB給鄰座男子後說。
「丁佑男有冇懷疑過你？」男子說。
「放心。我成班中學同學根本冇人知我考過警校，佢地統統以為我炒散做車房仔或者係做代客泊車。話時話，套戲太過言情都唔係幾啱我睇，如果冇事咁我走先，何SIR你走未？」招卓行說。
「個女主角患有心理障礙好慘，我想睇埋個結局先走。」男子像想著甚麼，喝過一口汽水後再對招卓行說：「其實你嚮興展堂個馬欖做咁耐扯皮條，有冇遇過有創傷後遺症的囡囡？」
「何SIR做乜咁問？你見識過咁樣的女仔嗎？」
「認識咗一段時間，但個女仔有創傷後遺症，平時講野間中會代入其他人思想，好似唔係佢本人咁。我想深入了解對方，又怕太過單刀直入會令佢產生抗拒感。」
「咦，何SIR唔係讀心理學的嗎？竟然有女仔你會搞唔掂？我認識過有創傷後遺症的囡囡都係被人老強過，唔知係唔係你朋友個CASE？」
「你係公僕，應該注意下口德，況且個女仔只係遇上一件不幸的事情，佢係律師，唔係你諗個種。」
「對唔住何SIR，係我口臭。其實你如果想了解佢多點，除咗得閒送花關心佢之外，不妨嚮佢工作方面入手，咁可以順便幫佢忘記以前的不幸遭遇，積極投入工作。」
「我最大毛病係每次都會分析其他人包括朋友的心理狀態，由於我真心想幫佢走出困境，久而久之，當咗佢係病人。」
「唔緊要，最重要係佢冧你，你冧佢，除非連個天都唔幫你就話啫。」
一個星期後，警方在灣仔O記總部約見關武雄。
「我係有組織罪案及三合會調查科的何定邦高級督察。今天邀請關先生前來係希望你能協助警方調查，為一單黑社會洗黑錢案提供線索。」何SIR說。
「我冇做過，你夠料做乜唔拉我，邀請我來即係擺明鋤我唔入啦，我要搵我代表律師。」關武雄說。
「我相信你有權搵律師，但我地亦都同時夠料起訴你，我地唔咁做係想你幫我地忙。」何定邦說。
「你地班差人，最叻點人做鬼頭仔，話你知我一定唔會做契弟。」
「你知唔知最近你大佬搵人查你穿佢櫃桶底單野？如果我地要起訴你可以立即封你名下賬戶，等你冇錢著草，如果我係你就唔會咁蠢封死自己後門，拒絕同警方合作。」
「既然你地都知道晒，好，就等我考慮一下。」
關武雄離開警署後，何定邦對同組的屬下阿賓說：「搵人幫我監視佢。」