（喪屍故）末世: （20）田忌賽馬

「我哋會用，初代MMA嘅形式進行比賽。」Edward 大叔

「MMA點玩？仲有初代？」家盈

「MMA揉合左散打、泰拳、空手道同中國功夫嘅站立技。仲有柔道、摔跤、巴柔等地戰。初代MMA冇太多規限除咗眼同下陰外。」我

「比賽冇重量級別，一個回合，直至分勝負先會完。鐵籠入面格鬥，可以利用鐵籠。我比兩日時間大家準備下。」Edward 大叔

「OK！」我





—————————————————
「有冇聽過田忌賽馬？」 我

「冇喎！」家盈同子寧異口同聲表示

「田忌鍾意同齊王賽馬賭錢。約定每人出三匹馬，跑三場。結果田忌嘅馬每一匹都跑不過齊王嘅馬，大敗。孫臏就教田忌用下等馬對齊王上等馬，然後用上等馬對齊王中等馬，用中等馬對齊王下等馬。結果贏二輸一。明未？」我

「Oh I see I see!」家盈

「你兩個仲話讀文學！」我





「首先要有三個人參賽。」子寧

「等我哋嚟啦！」竟然係阿宙，身邊仲有一個輪廓好似朗昇嘅少年

「呢個係？」 我

「佢叫朗逸，朗昇個細佬。佢本身因為射波，留咗喺屋企，上個月嚟咗揾佢阿哥，可惜....」阿宙

「乜你唔係走咗㗎咩？」我





「我條女要我留多幾日，於是我咪叫佢哋等埋我，留多幾日囉！」阿宙指一指三樓走廊，係阿龍佢哋

「𡃁仔，又幾似你阿哥喎。」我拍一拍朗逸嘅膊頭

「𡃁咩仔啊？我同你同年架！」朗逸

「係喎，朗昇大我一年，我仲係年尾出世，分分鐘你仲大過我。」我

「咁出場次序點分配？」我

「上等馬梗係阿宙啦，佢識Boxing,泰拳同巴西柔術㗎，中等馬就係朗逸仔啦，佢自細已經學跆拳，仲係黑帶高手嚟，你就做下等馬啦，出去挨下打又唔使死。」子寧道

「我仆你個.」突然阿行撳住我個口





「唔准鬧佢！」阿行

「唉...」我

—————————————————

「喺萬衆期待下，無盡歡呼聲掌聲，觀眾嘅氣氛已經被推到沸點。今日將會決定兩方決定權。大家拭目以待...待...待！」主持人將氣氛推到高峰，仲有回音添

朗逸嘅對手係一個叫做阿飛嘅人，比朗逸高出成個頭，佢主要係用西洋拳，左前右後。一個主要用腳，一個主要用拳，睇嚟必有一番龍爭虎鬥。

隨著鐘聲響起，比賽正式開始。阿飛擺好一個拳擊的格式姿勢，但朗逸向右作一個假動作，跟住向左衝前跳起，凌空飛腳掃向阿飛

「哇！好快嘅腳！」主持人

但假動作呃唔到阿飛，被佢一手擋下，朗逸腿一收，人向前衝就順勢變成一記側踢（side kick)。變招快，擋得更快。





兩人分別以拳頭互攻互檔。阿飛中了一拳飛向籠邊，論拳當然朗逸敵唔過阿飛，只能以腳取勝。

朗逸衝前一腳蹬向半跌的阿飛。阿飛喺空檔中一下上勾拳。兩人同時被擊中下顎。只係阿飛傷得更重。

「大好機會！」我

阿飛失勢，朗逸就跳起右腳向上擺，以凌厲嘅腳踭一下轟落去！

阿飛以組合拳連串攻擊。朗逸先擋，再以一記重腳踢中阿飛頭部。

「KO！第一場協記勝！」

「第二場！」





阿宙嘅對手係Marco。兩個同樣身高近六尺，兩人體重相若。Marco身體全身古銅色肌膚，阿宙就六嚿腹肌，皮膚卻白似女人。

拳手通常以雙拳打招呼。臭寸嘅Marco刻意用力，充斥挑釁味道，他示威，阿宙也不示弱，力頂Marco。

「阿宙善用巴柔同泰拳，Marco就空手道加柔道，似乎唔簡單」我

「𡃁仔，有見地。啱啱開始已經睇清Marco個底。」係Edward 大叔

「咁大叔你又唔使講到我好似王語嫣咁，只係佢嘅出手同馬步太明顯啫。」我

「哈哈，都係繼續睇比賽啦！」Edward 大叔

Marco雙手捉住阿宙右手，自己一轉背，一靠一頂

「Marco選手出招喇！打算撻低阿宙選手」主持人





阿宙用手掌頂住Marco腰背。Marco索性放手，向後撥開頂着背部嘅手。

再重新捉手再撻，今次真的被撻到地上。

「啊！」擂台上傳嚟一聲慘叫

唔係阿宙，係Marco

原來阿宙一腳踢向Marco上五寸下五寸，令佢跌低

阿宙雙腿分別鎖住頸同胸，雙手將Marco一隻手臂拉扯向雙腿之間

然後一下發力通過槓桿原理令Marco右手甩臼。

「啪啪啪！」三下拍地聲，代表投降，Marco用左手拍地投降

「睇吓你仲點撻！」阿宙

「Marco認輸喇！第二場協記勝！」主持人

「條腰有冇事呀？」家盈

「好腰好腎好男人，冇事！」阿宙

「垃圾！」阿宙指住倒下嘅Marco，用另一隻手喺頸劃一下

「係喎！咁我咪唔使打？」我

「根據規定，我哋要打三場，第三場一定要打！」Edward 大叔

「好，打咪打！」我