是咁的，照顧過我嘅護士死咗: 十四、甦醒

到我醒返，就聞到骨科病房獨有嘅爛肉臭味，而我嘅右腳、頸同兩個膊頭都安咗固定器。

「你成隻烏龜咁。」

「咁你拉我落公園放生啦。」

一醒就見到林林，佢啱啱幫我調較返托住我右腳條吊帶。

「無你咁好氣。做乜嚟呀你？搞成咁嘅。」





我將揹阿連嚟醫院嘅事講畀林林知，佢哼咗一聲，本身想彈我額頭，但後尾轉為用雪白嘅食指喺我眉心點咗吓。

「你呀，又唔係唔知自己身體點。」

「咁我朋友有事，我唔可以唔理架嘛。」

「你都幾有義氣喎。」

「少少啫，唔通由佢死咩。」





「依個世界好多人會由得人死架。」