是咁的，照顧過我嘅護士死咗: 四十五、如果

之後佢即刻收細返音量，揞住個嘴：「嘻嘻嘻⋯⋯sorry呀。」

我真係紅都面哂⋯⋯

「唔係呀，純粹係覺得你都咁大個人應該點都拍過啫。」

「但我真係無拖過女仔手架。」

「得喇得喇，我信你。」佢笑到眼淚水都標埋。





「嘿嘿，你睇下你隻手。」

林林好奇咁望下自己隻手：「吓？咩呀？」

「無震喇。」

就係啱啱引佢大笑嗰下，驅散咗林林殘餘喺內心嘅恐懼。

林林終於笑返，係最靚嘅笑容，我最鍾意嘅笑容。





「我又差你一個人情喇喎。」

佢再次伸出手指。

我都伸出完好嘅左手，舉起尾指。

由於我驚勾住會骨折，所以用手指頭點一點林林嘅手指頭。

「係呀，所以你未還哂啲債之前，我唔會有事嘅。」





如果，即係如果呀下。

當時我可以叫林林都應承我，喺還哂啲債比我之前都唔可以有事，咁今日，佢會唔會可以守到個承諾呢？