結果我都係怕咗佢,成日跟佢出去睇戲唱k行街食飯溫書,明明有男朋友,但啲空閒時間就同我一齊。

多得十八子嘅陪伴,我先慢慢返去學校。

而我都係返多咗幾日先知,十八子成日被老師召去照肺,同埋瘋狂留堂,再加埋要打理花園同打掃課室。

某日我趁十八子打理緊小花園,就走去幫手。

「你做咩嚟呀,我見小花園個打理表同清潔表幾個月都係你個名嘅?」





「我依啲不良少女成日都比學校針對架啦。」

但幾個月嘅懲罰,真係第一次。

至於我點解慢慢願意再返學,係因為我第一日試探式咁返學嘅時候,情況已經好轉咗啲。

可能因為過咗冷河,所以同學對我都只係眼望望咁,無再大聲笑我。

每當有眼神接觸,佢地就會避開。