是咁的，照顧過我嘅護士死咗: 六十、玻璃夫人

由嗰陣開始，我直接變成班級內嘅透明人，個個都唔理我，減少同我接觸。

老實講，相比企喺鎂光燈下被人笑，我會鍾意留喺一個無人注意到嘅暗影之中。

當我透明，總好過當我小丑。

不過內心最真實嘅願望，始終都係希望佢地可以當我係普通人。

所謂接納，對天生有啲異常嘅人嚟講，基本上係奢望。





所以我唔會妄想被接納，只要普普通通咁對我，無話特別唔開心，我已經好滿足。

我初頭都唔知點解班同學會轉咗對我用冷暴力。

直到有一日，我返學嗰陣見到班房後排嘅儲物櫃上某一格，出現幾隻塗鴉大字。

「玻璃夫人」

遭殃嘅係十八子嘅儲物櫃。





十八子返到班房，面色一沉。