是咁的，照顧過我嘅護士死咗: 七十三、玫瑰與百合

而同阿姨講完野後，我眼角就掃到有人喺學校大門嗰邊。

視線聚焦。

係十八子，佢跑向一個揸住一大束玫瑰嘅男仔面前，好開心咁收咗束花，錫咗個男仔一啖。

「你點知我想要花嘅？」

「點會唔知我女朋友想要咩喎？祝你畢業快樂！」





啊⋯⋯係十八子第唔知幾任男朋友。

「多謝bb！」

我咬住下唇。

佢男朋友察覺到我，指一指：「你朋友呀？」

十八子轉身過嚟，我即刻將張百合花紙仔收埋入褲袋。





「薯片，唔使簽啦，我走喇。」

⋯⋯

沉默咗半秒，我知無表情唔得，所以夾硬拉高自己嘅嘴角。

我拎出手機，向佢地兩個微笑：「十八子，你揮手丫。」

佢好快明白我想點，舉起手向我揮動：「拜拜！」





咔嚓。

拜拜。

「今晚腥返俾我喎！」

我點點頭。

十八子挽住男朋友嘅手，雙雙離開。

我望住手機張相，十八子揮手嘅相。

結果，都係無人幫我影依張相。