是咁的，照顧過我嘅護士死咗: 八十九、我地走咗去，啲病人又點？
「你諗下，林林積咗咁多假，補假要六十日內放咗佢，唔係就犯法。佢啲假從來唔會喺六十日內補得到，依單野爆咗出去會對醫管局有影響架嘛。」
我點點頭。
德仔飲埋啖咖啡，繼續講：「雖然有好多同事都係咁，但上面成日話唔夠人啊，拍硬檔捱下義氣唔好放住，唔通我地真係拍拍蘿柚走咗去咩？」
你唔夠人手係你嘅事，點解要我捱義氣先？
如果係普通行業，講依句野已經大哂。
「但我地走咗去，啲病人又點？」
德仔話網民鬧佢地被無謂嘅救人道德綁架，但實際上當佢望到病人因為人手唔夠，所以得唔到及時照顧而痛苦嘅表情嗰陣，佢就好清楚自己做唔出掉低哂啲野走去放假依種事。
「雖然佢地又串又成日喊又尻叫又無禮貌又麻煩，普遍都係咁架喇，痛到七彩心情一定差架喇，總之病人都係西客多。但就算係咁，見到佢地好返，都係開心事嚟嘅。而我諗，好多同事都係咁諗。」
所以除咗林林以外，一定仲有唔少爛好人積咗好多假但無補假。