是咁的，照顧過我嘅護士死咗: 九十六、放開林林

當下一刻我已經火燒心，以我嘅最高速拐下拐下咁走過去。

「放開林林呀死蝗蟲！」

我已經一手舉起手中嘅拐杖準備一野挫落去，但我發現林林無反抗。

而大叔本來伏喺林林膊頭上嘅面抬起嚟，見到我準備攻擊佢。

大叔流緊眼淚。





呃？

林林轉身望向我：「金仔？」佢嘅視線放喺我高舉嘅拐杖度。

「搞咩呀你，放低枝野先啦。」

我觀察緊林林同大叔嘅互動，淨係見到大叔背對我地抹眼淚。

「我驚佢傷害你丫嘛。」





林林反白眼：「佢無傷害我呀。」之後一秒西面：「你放唔放低呀？」

我好似隻被主人鬧嘅狗咁，死死地氣放返低枝拐杖。