是咁的，照顧過我嘅護士死咗: 一百四十七、嚇鬼死我

到林林擘大眼嗰陣，已經係第二日嘅事。

我通宵守咗喺病房外嘅走廊，又打電話返公司請病假。

「又請呀？你不如全職做病人啦？」

「係係⋯⋯唔好意思呀。」

「咁又唔使唔好意思，你返嚟都係碎下紙打下窿啫，有你無你都係咁上下。」





好彩我係政府內部嘅冗員，所以就算唔返工都對所有運作無乜影響。

「我知你諗乜架，你千祈唔好亂諗呀，一嚿垃圾都有佢嘅作用架。」

「我知架喇。」

「返嚟補返啲醫生紙畀我。」

通知完上司，再通知埋媽媽之後我就一路等到第二日嘅探病時間再入病房。





德仔琴晚約略同我講過林林無大礙，我先安心啲。

「唔⋯⋯唔？」林林有啲錯愕咁望住我。

「你真係嚇鬼死我喇。」