是咁的，照顧過我嘅護士死咗: 二百一十六、傳說中嘅大籮

阿連嘅提議其實唔差，可惜我經過中學嗰次表白之後對寫情書有種根深蒂固嘅恐懼。

點解有人幫人寫遺書，但無人幫人寫情書架？

諗咗一輪，都係決定就咁送畫就算。

連寫封情書都唔敢，我有時都覺得無地自容。

但保持距離，永遠係防止受傷嘅最佳方法。





行車有兩秒距離，炒車都無咁傷啦。

無驚無險，又到五點。

放工之後我就去咗廣華覆診同拎藥。

喺骨科等緊嘅時候，我見到一個又肥又矮嘅老女人，身著制服，企喺德仔面前對佢指指點點。

望一望佢下盤，睇嚟佢就係傳說中嘅大籮。





德仔耷低頭硬食大籮嘅指責，見到佢個表情深深不忿，拳頭揸到實一實。

我決定行近啲聽下佢地講乜。

「魏牘金，到你喇。」但正想過去嘅時候，新人阿正就叫我入房。