是咁的，照顧過我嘅護士死咗: 二百三十六、畀你瞓
「咁我沖涼先喇，你要零食就自己喺櫃攞啦。」
媽媽向十八子露出慈祥嘅微笑，就拎住衫褲毛巾行入廁所。
其實佢地某程度上都幾似兩母女，我諗十八子同我媽媽應該係唔會有婆媳糾紛嗰類組合。
十八子當正自己屋企咁喺櫃度拎出大阪燒醬油味薯片同四洲蝦餅就衝咗入我房。
依個女人由以前開始就係咁唔痴自己屋企。有人收留就會即刻答應，唱通k飲通頂從來唔知會屋企人。
十八子見我行動不便就自動自覺將我床上嗰兩層床褥拉咗一層出嚟噠落地下。
同平日唔同嘅係佢坐咗喺地下張床褥度。
「轉死性呀？」
「你係病人，畀你瞓床呀！」
啪咔，十八子胸有成竹咁咬咗一啖脆脆蝦餅。