是咁的，照顧過我嘅護士死咗: 二百三十八、草圖

「好野！十八子贏咗十八子！魏牘金係烏龜！」

「點解你輸咗但我係烏龜？」

十八子得戚咁望住我：「我話你係你就係！魏毒金錢龜！」

「費事睬你。」

媽媽沖完涼就到我，雖則十八子貪玩，但我信得過佢唔會搞我認真畫嘅草圖，所以無特登收埋。

「沖乾淨啲呀你。」

話就話沖涼，但其實主要只係洗頭。

由於身體唔方便，又有石膏又有固定器，所以我只能夠用熱毛巾抹身。

到我刷埋牙搞掂哂返到入房，就見到十八子雙眼發光咁望住我枱上嘅草圖。