是咁的，照顧過我嘅護士死咗: 二百四十二、期待你的百合花喔

到咗星期六，十八子早過我起身，喺枱上面留低咗張字條。

「期待你的百合花喔，薯片：）」

琴晚佢講完同大雄一齊好快就瞓咗，依家十一點半，無男朋友嗰陣佢會同我食埋午餐先走，有男朋友自然係約咗人出街拍拖啦。

我始終，都只係十八子由細識到大嘅青梅竹馬，除此以外乜野都唔係。

我依平日嘅日程食藥，拎屋企嘅隔夜飯整咗碟餐肉蛋炒飯，解決咗早午餐。





一路食，我就無聊咁開電視睇。

「沙中線醜聞不斷⋯⋯」

轉台。

「⋯⋯依套冚家掃把剷！」

轉台。





「⋯⋯引渡條例於立法會進行二讀⋯⋯」

轉台。

「世界末日架喇！」又周星馳？

人愈大，愈覺得電視無野睇，開咗都係轉台轉台轉台咁。

「依個世界公平咩？依個世界公平咩？」





轉台。

「⋯⋯再有中學教師疑壓力⋯⋯」

轉台。

「美源髮彩，無得彈。」

轉台。

「⋯⋯自殺，警方話事件無⋯⋯」

轉台。

「⋯⋯有民眾到政總抗議明日大⋯⋯」





轉台。

「⋯⋯無用架。遇到衰野呢我就會講，預咗架啦。」

我都係去電腦開劇睇算數。