是咁的，照顧過我嘅護士死咗: 二百四十八、喺附近？

一時之間，我喉嚨好似被無形嘅手用力壓住一樣，唞唔到氣。

「⋯⋯呃⋯⋯點⋯⋯點會架？」

電話對面嘅林林好似有野卡住喺喉嚨咁：「⋯⋯係我⋯⋯係我⋯⋯害死佢⋯⋯」

「你亂講乜野呀？點會係你？你⋯⋯」

「⋯⋯如果我無請假⋯⋯德仔就⋯⋯德仔就唔使死⋯⋯」

我完全睇唔到兩者嘅關係。

林林繼續無聲飲泣，聽得到旁邊有把女仔聲安慰緊佢。

佢嘅喊聲漸漸增加，我開始聽到手機同環境嘅迴音。

林林⋯⋯喺附近？

我轉頭，望向坐喺酒吧大門旁長凳嗰兩個女仔。