是咁的，照顧過我嘅護士死咗: 二百七十三、死基佬
本來林林返到醫院都一直處於自責嘅愧疚之中，直至阿正同佢講自己嘅所見所聞。
阿正即係大陸阿叔食煙嗰日，林林叫佢打電話搵警衛嗰個年資較淺嘅護士。
其實阿正都係一直喺骨科盡忠職守嘅護士，亦照顧過我好幾次，不過佢嘅特徵就係無特徵，好難令人記得。
普通嘅髮型同普通嘅五官，配上普通嘅身材，喺醫院內極為唔起眼。
係嗰種有時喺你身邊都會唔知佢喺度嘅人。大概同《黑子的籃球》入面嘅黑子差唔多。
係阿正同林林講，佢聽到大籮同德仔講乜。
德仔死前一日，佢地企喺走廊講咗好耐野，於是佢經過嗰陣，無意中聽到一啲內容。
由於佢存在感低，所以即使借啲已喺佢地兩個身邊徘徊都無被察覺，就聽到一啲斷斷續續嘅對話。
「我知道係你投訴我架，死基佬。」