是咁的，照顧過我嘅護士死咗: 二百七十四、使用者與檢查者
「我懷疑係大籮整蠱德哥架。」阿正推測。
使用過期醫療工具嘅失誤，追究責任的話，除咗使用者，檢查者都責無旁貸。
因為檢查後發現過期工具，檢查者都要將工具報銷。
偏偏無論使用定檢查嘅人，都係德仔。
阿正話檢查醫療用具有無過期主要由大籮負責，但林林請假之後，大籮就叫德仔幫手檢查一小部分。
德仔本身就頂緊林林請假嘅工作量，仲要檢查埋醫療器材，根本百上加斤。而且佢對檢查程序唔熟悉，等同叫一個返完朝早正職再揸夜更巴士嘅P牌司機，出錯嘅機率自然會提高。
最大嘅問題係，無證據指證大籮嘅惡行。
阿正佢地幫德仔整理遺物嘅時候，有一封畀林林嘅信。
「由你嚟拆，先係最合適。」
阿正將信封遞畀林林，德仔嘅遺書。