是咁的，照顧過我嘅護士死咗: 二百九十八、咩嚟架？

喺眾人目送之下，棺材被抬上車，德媽摟住德仔嘅遺照上車，去火葬場。

本來堆滿人嘅後巷，人潮散去之後又再變得孤寂冷清。

林林同我並排坐喺巷邊嘅石壆上，林林拎出袋中嘅紅萬，抽出盒中一枝煙。

「食埋依枝唔食架喇。」我都無講野，佢就自己向我保證依枝係最後一枝。

「頭先啲人⋯⋯係你叫嚟？」





噠。

林林點著煙，吸咗一啖，點點頭：「嗯。佢地都係德仔照顧過嘅病人，好多都好有心。」

「係，真係好有心。我諗德媽⋯⋯應該都幾震撼。」

「我係咪⋯⋯好多管閒事呀？」

「⋯⋯唔係。畀著我都會咁做。」





林林無力一笑，噴出味道濃烈嘅白煙。

我地兩個之間，有陣短暫嘅沈默。

煙纏綿林林嘅面容，我發現佢嘅黑眼圈深色咗。

「依排⋯⋯好辛苦？」

「少少啦，頂得住嘅。係呢，咩嚟架？」林林指一指我掛喺左膊頭嘅黑色長筒。