「啊,依個送畀你架。」我將一直掛喺左膊頭嘅畫卷筒遞出去。

我終於送到幅畫畀林林喇!

「希望你⋯⋯」

「⋯⋯對唔住⋯⋯」林林打斷咗我:「我今日真係無心情收禮物⋯⋯」鄭重咁拒絕咗我份禮物。

「啊⋯⋯好嘅。」既然對方講到出口,我亦無謂死纏爛打。





我分唔清楚,林林係真係今日唔想收禮物,定已經間接拒絕咗我。

「你之前咪幫我保釋嘅?我仲差你一個人情。不如咁⋯⋯我約你一日吖?嗰日⋯⋯你先送畀我,好唔好?等我心情好返少先。」

「約⋯⋯約約約約我?」

「嗯。約約約約你。」林林向我微笑。

「幾時邊度做啲咩呀?」我個心跳再跳快啲唔知會唔會整碎我啲胸骨呢?





前幾秒仲因為林林唔收禮物而頹咗,依家就已經完全無唔開心,淨係得返興奮同期待。

林林諗咗一陣,之後話:「你之前咪話送我返屋企當還人情嘅?搵日⋯⋯你送我返屋企好無?不過我就放九點嘅。」

「好!我會等你架!」

煙燒到盡頭,林林將煙頭壓熄,就企起身。佢今日難得地請咗假,但只係為咗參加德仔嘅喪禮。

佢無去示威,無亦無周圍去,而係獨自返咗屋企。





手機震動,係林林嘅wtsapp。

「下次見面,再收你份禮物:)」