是咁的，照顧過我嘅護士死咗: 三百零九、斷手

我亦已經食完飯，抹一抹嘴，準備走人。

「咁佢落到嚟，佢做咗護士已經等於搶咗另一個香港人成為護士嘅資格！」

我終於忍唔住反白眼，十八子已經為咗攻擊林林而無所不用其極。

「咁你做到護士一樣係搶咗另一個香港人成為護士嘅機會。」

同一夫一妻制嘅社會一樣，你同愛人結婚，等同於其他人無得同你嘅愛人結婚。





十八子係註冊護士，佢入嘅中大護理系每年有六千人報讀，但學位只有二百個。

以佢嘅理論，佢所得到嘅學位都只係由另一個人手中搶返嚟，嗰二百人都只係搶贏咗另外五千八百人。

「⋯⋯⋯⋯咁你答我，佢住邊吖？」

「南山邨。」

「咁咪已經搶咗香港人嘅資源！公屋係畀佢地住架咩！？」





十八子愈講愈嬲，聲浪之大令其他食緊飯嘅醫師護士都望咗過嚟。

「我都睇唔起嗰堆落到嚟香港讀書又唔學廣東話仲叫我地用普通話教授唔用就打人嘅NDS，富貴嗰堆就買樓洗黑錢炒高哂啲樓價搞到有屋無人住有人無屋住，窮嗰堆就打尖上公屋日日喺屋企瞓覺拎綜援得閒去染髮整水晶甲仲要話綜援唔夠錢無得去旅行，去公立醫院搶疫苗又嘈冤巴閉打尖走去打護士，走水貨掃我地啲日用品炒高哂尿片奶粉物價自己就賺到盤滿缽滿，喺地鐵又嘈又叫又食野又周街屙屎屙尿嘅死蝗卵。個個對香港社會無貢獻之餘又搶咗分薄咗我地嘅資源，唔感恩不特止仲要睇唔起香港依個地方嘅社會寄生蟲啊！但林林唔係咁嘅人吖嘛！佢喺依度生活講我地嘅語言，無拎綜援自食其力，做咗咁多年護士每日每分每秒都盡力為病人，咁佢係咪要瞓街吖？你係咪要一個盡心盡力嘅護士瞓埋街先安樂？就係純粹因為佢係大陸落嚟所以你就唔睇佢本身嘅行為就斷定佢係咩人，喺你眼中就算佢救人救到死你都會話佢係大陸人所以抵撚死。就算林林真係瞓埋街你都會話佢霸撚咗天橋底個位搞到另一個香港乞衣無位瞓架啦！因為喺你眼中只要喺大陸出世就係錯，林林係大陸人所以都係錯，所以林林嘅存在本身就係原罪吖嘛！」

啪！

我一掌咗落枱面。

啪咔咔咔。





腕骨斷裂嘅聲音。