是咁的，照顧過我嘅護士死咗: 三百一十、堆滿人

十八子嘅火氣頓時消失，望住我隻手。

「薯片⋯⋯你隻手呀⋯⋯」

我隻手仍然停留喺枱面，被佢講一講，我當堂感覺到一陣強烈嘅痛楚由手臂衝上腦神經。

十八子起身想睇我，我即刻好似林雪喺《功夫》入面講：「唔好郁⋯⋯斷咗。」

「無得唔郁囉！我帶你過去骨科嗰邊啦！」





雖然啱啱佢仲係對我好唔滿意，但一見到我斷手骨，態度已經一百八十度轉變。

至於我嘅怒火已經被痛楚淹沒咗，因為真係好很痛呀師父！

我地兩個即刻急急腳走人，十八子嘅午飯時間仲未完，所以佢陪我一齊行去骨科。

由食堂行去骨科話遠唔遠話近唔近，行咗一陣我地就到。

十八子陪我登記分流，一齊喺度等醫生睇我。





過咗一排無嚟，估唔到骨科床位已經愈開愈多，只要有空間嘅地方都會加床。

醫院本身嘅病房床後面有排制，啲床亦大啲同多功能啲。不過加開嘅床就細啲，而且設備比唔上普通常設床位，主要淨係可以調較高度同得一個平安鐘。

無論病房內定外面等睇醫生嘅空間，都堆滿哂人。