是咁的，照顧過我嘅護士死咗: 三百一十二、無腦
「我好明白你心情，所以你要鬧大陸人，我會陪你一齊鬧。但你唔可以將所有壞嘅特質都套落林林度。」
至少，林林唔係加重我地負荷嘅一員。
「知道喇⋯⋯我唔會再話佢架喇⋯⋯」見我嬲到拍枱斷手，十八子都妥協，唔再爭論。
「你攰架喇，我幫你啦。」十八子同我接力，托住我無力嘅右手。
講到尾，依家會超過負荷，係因為當年對醫療無長遠規劃，無起醫院，培養人手嘅學位無增加。
香港九七之後都發展咗廿年，醫療體制都無改過，人口又多咗，但仲用緊九七前嘅舊方法，有乜可能唔死？
而就算今日香港有好好嘅醫療體系，只要人口非自然咁增加，到頭嚟都係會爆煲。
假設今日嗰一百五十個單程証個個都係談吐優雅，大方得體，舉止端莊嘅日本人都好，香港人嘅醫療體系依舊會崩潰，人口流入速度永遠會快過你建立相關配套。
一日一百五十個，一年小計都五萬人落嚟，我當你一年就起到一間有一千個床位嘅醫院，嗰五萬人得百分之一要入院，都已經佔咗你一半床位。
雖然話係制度同政策嘅問題，但制度同政策都係人訂，歸根究底就係上面嗰班高官屎忽鬼無腦。