是咁的，照顧過我嘅護士死咗: 三百一十七、休眠

林林叫到，我當然應承。不過人愈多嘅地方對我嚟講係愈危險，所以依單野唔可以被媽媽知道。

我等林林九點放工之後，就陪佢搭過海巴士去政總。

見到林林一上巴士就釣魚，個頭中下中下咁，我都唔好意思撩佢傾計。

街外橙黃色嘅光影撫過林林蒼白嘅面容。

素顏嘅林林睇嚟面無血色，如果唔係佢胸口有細微嘅起伏，你話佢係死屍都有人信。





林林唔使幾秒就瞓著咗，架巴士震咗一下，佢個頭就撞咗埋玻璃窗，醒咗。

「唔⋯⋯」佢睡眼惺忪咁捽下個頭，之後望望我，又合埋眼。

林林輕輕伏咗喺我左邊膊頭。

佢好快又瞓著，但頭部因為巴士嘅震動而幾乎喺我膊頭滑落嚟。

我知佢一滑落嚟就會醒，見佢咁攰真係唔忍心佢僅餘嘅休息時間都瞓得唔好。





於是我伸出隻叮噹手，輕輕托住林林嘅額頭。

右手腕發出痛苦嘅抗議。

「安心瞓啦，林林。」