是咁的，照顧過我嘅護士死咗: 三百一十六、叮噹包剪揼

「都係。呀，我同你玩叮噹包剪揼吖。」

即係用三種拳頭各自代表包剪揼。

我即場示範畀林林睇，手心向天嘅拳頭係包，手指公向天就剪，手背向天就揼。

「贏咗有無獎架？」林林天真咁問，佢輸緊。

「贏咗有一個願望。」





「乜都得？」

「能力範圍內做到嘅，就乜都得。」

「好呀，嚟啦。」林林仲係咁天真無邪，我已經諗緊要許咩願望。

「包剪揼！」

我伸出左手出包，因為林林無論出邊種拳頭都係揼嚟，所以我包一定贏佢。





點知佢出剪。

「點會咁架⋯⋯」難以置信⋯⋯十八子明明輸咗都唔知咩事⋯⋯

「你輸咗喎。」林林露出小惡魔咁嘅奸笑：「要實現我一個願望。」

「⋯⋯願賭服輸，嚟啦！」

「咁⋯⋯」林林眼仔碌碌咁左望右望，有啲似牛奶妹個公仔咁。





「不如你陪我去靜坐吖？」