是咁的，照顧過我嘅護士死咗: 三百二十三、謝婉雯

當晚我當識朋友咁同黃醫生傾計。原來佢就係今次白色運動嘅發起人，份人好友善，講咗好多野我知。

比如佢會做醫生嘅初心同原點。

「救人。」

佢住屯門，細個試過一次肺炎咳到出血，所以送咗入醫院。

「當日，我見到天使。」





一個慈祥過佢自己媽媽嘅女醫生好有心機咁幫佢檢查。

「當年讀緊中學，之前一直渾渾噩噩唔知自己想做乜，直到我遇上嗰個女醫生。」

出院嗰日，年青嘅黃醫生向嗰位女醫生講：「我第日都要做醫生！好似你咁醫返好啲病人。」

對方微微一笑，拍拍佢嘅膊頭。

「加油呀，你實得架。」





黃醫生一直，一直記住女醫生心口前嘅名牌嗰三個字——謝婉雯。

再次見到依三個字，係喺二零零三年嘅報紙上面，第一位因為沙士而殉職嘅公立醫院醫生。