但林林從來唔會同嫲嫲講學校嘅事,返到屋企又會變返一個乖乖女。

如果當時佢有講出嚟,可能嫲嫲講一兩句說話已經可以點醒佢。

林林討厭學校,討厭醫院,唯一鍾意嘅地方就只有屋企,只要見到嫲嫲,就無論幾苦都捱得過。

就算見幾多次家長,嫲嫲聽過幾多次林林喺學校同人鬧交打交嘅事,都從來無鬧過佢。

依種對孫女近乎溺愛嘅方式,只有阿公阿婆級嘅長者先做得到。





做孫嘅面對依種愛嘅方式只有兩種取向,一係就當公公婆婆爺爺嫲嫲嘅愛視為理所當然,輕視佢地嘅存在,直到失去先後悔。

另一種就係由心底感受到佢地嘅愛意,對佢地產生超越對父母嘅依賴同尊敬。

林林就係後者。

為咗嫲嫲可以放棄一切,只要係嫲嫲嫲講過嘅人生道理就一定會銘記於心,佢叫過唔好做嘅野就唔做,亦會為咗佢做兼職將成份糧上繳,只要嫲嫲一有時間就兩個去飲茶晨運⋯⋯

林林嘅煙酒錢全部都係由大家姐幫佢畀,因為林林話過佢唔會將錢用喺娛樂自己之上,只會用喺嫲嫲度。