「呃⋯⋯嫲嫲⋯⋯依個係⋯⋯呃⋯⋯」

嫲嫲走近林林,錯愕嘅神情漸漸逼近。

「大家姐一見到已經想起身凶嫲嫲,不過我捉住咗佢。」

林林向大家姐搖搖頭,佢從來無見過嫲嫲咁嘅表情,即使係撞正佢食煙飲酒,嫲嫲都從來無鬧無話,只係微笑住提醒佢唔好食太多。

就算每次見家長被老師點鬧,知道林林喺學校做幾多衰野都好,嫲嫲同佢喺返屋企嘅路上面都只會問今晚想食乜餸。





「我曾經好奇問過嫲嫲,點解咁縱我。」

嫲嫲話林林細個已經見過地獄,就算依家做乜野,作為阿嫲都無辦法狠心教訓佢。

即使明知孫女傷害到其他人,又喺外面蝦蝦霸霸,仲要食煙飲酒傷害自己嘅身體,佢都狠唔到心。

喺嫲嫲眼中,孫女嘅行為係逼不得已。

老人家嘅眼光同感覺向來都比其他年齡層嘅人更敏銳,好多野其實一眼就睇得穿。





嫲嫲眼中嘅林林,只係被現實拉住嘅扯線公仔。

既然孫女嘅行動係為勢所逼,又點忍心鬧得出口?