病房又回歸寂靜,但好快就被一個聲大夾惡嘅病人搞到嘈冤巴閉。

「我唔要依個碗裝粥呀!我自己帶咗飯壺嚟,你幫我去裝落個壼度。」

「阿太太,依個碗同你個飯壼有咩唔同呀?我幫你去裝,依碗又唔要得,仲要行多轉落廚房架。我唔係淨係睇你一個病人,依家唔夠人咪咁多要求好無?」

做到燥哂底嘅姑娘都已經忍唔住話個女人,本身依對護士病人組合就係火星撞地球,不過今日正面交鋒,對病房嘅影響就比平日大好多。

「我唔理!你地醫院啲碗洗得唔乾淨架嘛,我要用我個飯壼裝!有咩細菌感染到我點算呀?」





「我要喺度睇住其他病人,唔得閒同你癲。等一陣姐姐嚟同你去換啦。」

「吖!人做姑娘你做姑娘,你家陣咩態度呀?」

「你咩態度對我,我咪咩態度對你囉。」

「醫生話我依家夠鐘食野,你快啲幫我裝過!」

「等姐姐嚟同你搞啦。」護士想行開繼續派飯,個女人就一手捉住佢。





「我依家要食野食藥呀!唔食藥我會死架,嗱我依家死喇,我死喇,唞唔到氣呀我,死喇我!」

最後姑娘都係投降,拎咗個飯壼急急腳出咗去,幫個女人裝粥。

病房罕見咁,呈現短暫嘅真空狀態。