是咁的，照顧過我嘅護士死咗: 三百七十五、熟悉嘅甜味

我都唔知自己喊咗幾耐，由第一聲開始就無停過，無睇過時間，因為對眼好似浸咗落水咁，好模糊乜都睇唔清。

成個平台就只有我一個人嘅喊聲。

直到有人企喺我面前，我先夾硬逼自己冷靜落嚟。因為我唔想被外人見到一個大男人喊成咁。

「嗚。」被人塞咗粒野入口。

好甜，好熟悉嘅甜味。





我抽搐住咁抬頭向上望，就見到一個女仔，佢嘅表情明顯嬲爆爆，但又眼泛淚光。

「仲搵你唔到？」十八子叉住腰，嘟起嘴。

佢明明著裙，但完全無理就咁坐喺我旁邊，好似唔驚會走光咁。

口內嘅朱古力融化，甜味令我嘅心情稍為好咗少少。

「伯母好擔心你呀，話你無返屋企，手機又唔開。好彩我有睇新聞，醫院入面都傳緊柳姑娘嘅事，我知你實好大打擊，所以即刻周圍搵你。幾驚你做傻事呀！」





我索一下鼻水：「點解⋯⋯你知我喺度？」

「我都係搏一搏咋，見過你幅畫吖嘛，咪估依度囉。」

我正想開口嗰陣，十八子又塞咗粒朱古力入我口。

之後佢就無講野，靜靜坐喺我旁邊陪我。