心入面懷住最後一絲希望去到南山邨,行返當日同林林一齊行過嘅路,去到彩虹橋。

成個平台只有我一個人。

諷刺嘅係,偏偏今日天上有星星。

好似嘲笑緊我地嘅命運咁,一閃一閃。我想將佢地喺夜幕上扯哂落嚟一把火燒哂佢。

我一個人喺平台望住彩虹橋,又環視身邊,由遠到近,再由近到遠。





我拎出畫筒入面嘅畫,想拉開佢雙手舉喺頭頂,但左右手都有傷,我連展示自己張畫都做唔到。

我用盡方法去試,但拉開咗少少佢又捲返捚成圓筒狀。

我終於放棄,隨手將幅畫丟喺地上。

點解?

點解啲星星要喺今日出嚟?





點解我兩隻手都傷哂,連拉開幅畫都做唔到,搞到咁狼狽?

我無力咁坐喺把上,挨住彩虹橋,打算開音樂為死咗嘅林林獻唱我嘅表白歌。

但手一伸入袋,就記起自己丟爛咗部電話。

到依刻,我終於忍唔住,眼淚滲咗出嚟。

我真係咩都做唔到。





無論係林林生前定死後,我都只係一條乜都做唔到嘅廢柴。

「⋯⋯對唔住⋯⋯對唔住呀林林⋯⋯」

我喺彩虹橋旁邊縮埋一嚿,好似畀人抛棄嘅孤兒,又好似冬天嘅街頭乞衣咁,不停流眼淚,不停喊。