是咁的，照顧過我嘅護士死咗: 四百零八、示威實況

四點幾，我終於抵達金鐘，喺補給站拎咗白袍就著咗上身。啲義工見到我塊警告牌都話多謝我咁都企出嚟。

每個示威者都好友善，聽講前線不停發生衝突，我地依啲喺後方嘅補給站就好和平。唔少人向拎住盾牌同戴住防毒面具嘅防暴警察送水同餅乾，但佢地唔收得。

大台同網媒嘅記者去哂前線，我地依度就得返普通民眾用ig開直播。

好多示威者見到我塊警告牌都過嚟同我影相，我地互相打氣，分水同食物。

傳聞政府有機會出催淚彈，所以好多人都帶備咗保鮮紙包住外露嘅皮膚。





佢地仲好小心咁幫我包埋。

由於超級肺炎肆虐緊嘅關係，所有示威者都唔敢除安全眼鏡同口罩，四月尾嘅天氣又濕又熱，令唔少人中暑，要其他示威者照顧，亦有人熱到昏迷。

救護車沿住大馬路慢駛，示威者好似純白嘅紅海咁一分為二，讓路畀救護車救人。

我隨意問人借電話，聽到嘅人個個都隊部手機出嚟，搞到我都唔知用邊部好。

最後我求其借咗一部打畀媽媽，佢話十八子推咗入手術室，醫生無透露太多資訊，我地依家可以做嘅唯有喺心入面求個天保佑十八子。





之後我又打畀阿連，佢話喺中心區域，依家嚟我依邊。