是咁的，照顧過我嘅護士死咗: 四百零九、參加原因
「係呢，係咩驅使你有脆骨症都落嚟遊行呀？」
借完電話，一個示威者問。
佢係一個男仔，普普通通、唔高唔矮、唔肥唔瘦，雖然戴咗口罩但應該係唔靚唔醜，一句到尾就係路人樣。
「⋯⋯啊，我有三個朋友都係護士嚟。一個係處處為我著想嘅朋友，一個係我由細玩到大嘅青梅竹馬，仲有⋯⋯一個我鍾意嘅女仔。」
我將我經歷過嘅故事娓娓道來：「⋯⋯德仔一直有個理想，就係升做阿爺之後可以由內部去改變醫療體制⋯⋯不過後來因為工作量太多，出咗醫療事故⋯⋯」
有人聽到眼濕濕，而嗰個路人樣示威者就不停抄筆記。
「⋯⋯因為佢嘅離開，令林林覺得好自責。於是佢想背負埋德仔嘅夢想，想幫佢實現佢實現唔到嘅夢。但係工作量太大，佢放咗工仲要參加白色運動，示威完又要溫書⋯⋯結果⋯⋯」
講到我想表白嗰日，林林生日嗰日，佢就猝死咗，我嘅聽眾已經有幾個忍唔住流咗眼淚。
「而我由細玩到大嘅青梅竹馬十八子，依家仲做緊手術⋯⋯」
佢地輕輕拍我膊頭，幫我打氣：「佢會無事架。」