【幸運了，然後呢？】: Chapter 15 【友人的願望】

Kenny突如其來的來訪，雖然說不上古怪，但正所謂無事不登三寶殿，我總是覺得他是有所求或者有所提問。
 
正當我感到有點茫然之際，他從衣袋中取出了一張卡片給我，這張並不是普通的卡片，而是新店開張的邀請卡，只是尺寸設計成卡片般的大小，完美的特顯出Kenny在事業上貫徹節憸的原則。
 
「WoW！真係開分店啦？」
 
「其實都準備咗一段日子，希望今次你嚟啦。」
 
我和他站在店門旁，他好讓裝作詢問貨品的客人，亦尊重正在工作的同事，縱使我們聊著的是閒話。
 


「今次一定到！放心。」
 
「我都邀請咗Monnie，但佢去唔去就真係唔知。」
 
「Bro睇開啲。」
 
他拍了我的臂膀一下笑說，
 
「講呢啲，不過.....我係有兩件事有求於你。」
 


「係咩？」
 
「第一，嗰晚嘅酒吧學術研討會，希望你唔好講出去，成件事諗返都好on9。」
 
「你啲嘢我幾時有講返出去呀。」
 
「而家，成個人都唔同晒，對比起以前返工，至少無頭茸茸呀。」
 
「你又知。」
 


「唔通有時候行過偷望下你又話你知咩。」
 
這句話雖然有點「基」，但聽起來卻有點窩心。
 
有一刻，我覺得Kenny雖然是別人口中的仆街，行為、處事、說話和想法較為下賤和涼薄，但說到真性情，卻是一些表面謙遜正直的人所比不上，至少在這個人面前，真的沒有任何顧慮。
 
「你真係唔覺得我突然間轉變，你會有所好奇？」
 
他想了一想，
 
「有咩好奇？咪係一件好事。」
 
「都係嘅。」
 
「但我曾經真係懷疑過一樣野，就係以前黑到極點嘅你，而家竟然有一個咁大嘅轉變，仲會溝到女！」


 
我點了點頭，他接著說，
 
「我想問你係咪養鬼仔？」
 
「唔知你信唔信，我真係因為嗰次意外而改變。」
 
「我知，至少你以後唔敢淘寶同埋再無Caca呢個人煩你嗌你買嘢，聽講佢返咗大陸。」
 
「......我講真。」
 
「唔通你有咗超能力？」
 
「上次嗰晚同我一齊走嗰個女仔，佢同我瞓完之後，佢想同前任過情人節嘅願望實現咗，仲復合埋，自從意外之後，我好多日常嘅願望都可以實現，而且咩都變得好好運，例如地鐵壞車嗰日我總係會因為一啲嘢而坐咗巴士，或者提早出門口；準備放工嘅時候個天落緊大雨，但到我真係走嘅時候就會停雨或者雨勢會減弱，直到最近我發現咗原來係因為一個女仔同我交換咗，佢而家變得好黑，而我就拎咗佢啲運！以上種種嘅契機就是觸電，正正係因為你喺酒吧飲大咗，同我講咩人體，我至揾到解釋！」
 


好吧，說完這些例子，我再一次感到事情的不可思議，而Kenny聽到後就像電影中的角色聽到主角是超級英雄時的反應。
 
「嘩，性交轉運？喂！如果係真嘅，你可以貢獻社會啦今次。」
 
我舉了這麼多例子，而他的著眼點只是在性交轉運......
 
「......我無興趣呀！你聽唔聽得明我個意思呀？」
 
他思索了片刻，突然如夢初醒，
 
「即係如果我想同Monnie復合，就要你.....」
 
話音剛落，他用手掩著自己的「後花園」。
 
「如果真係要咁樣做，你個願望至可以實現，我唯有祝福Monnie新婚快樂同埋叫你睇開啲。」


 
「嗱，如果係真嘅，一場兄弟你無理由唔幫我？」
 
「你真係願意為咗Monnie付出你個......第一次？」
 
「屌，我地到底喺度講緊咩？」
 
我沒有回應，他認真細想後對我說，
 
「雖然好似係事實，但始終太不可思議，我都係當聽完就算，如果你真係想實現我嘅一個願望嘅，就係唔好打我個雛菊嘅主意，祝你幸運同幸福！」
 
語末，他雙掌合十的當作祈求，並提步離開。
 
幸運......
 


倘若沒有幸福的話，所謂的幸運根本就不存在，只是單純的運氣。
 
至少，我這樣覺得吧。
 
突然，他再次走了回來對我說，
 
「頂，有兩件事揾你嘛，第二件事，我嚟呢度其實係為咗買返個喇叭，舖頭個喇叭壞咗。」
 
「Okay，歡迎光臨，睇下有咩款可以介紹返。」
 
「好呀，不過講真，假設到我有一日後悔，真係唔想Monnie結婚，想佢同返我一齊，你會唔會幫我？」
 
「下？」
 
「Sorry，Bro，其實我都係過唔到自己，我都係問下咋。」
 
「認真，如果真係要咁嘅，原諒我幫你唔到。」
 
「但我都想確認一下我地嘅友誼，你答我會唔會幫我？」
 
「Sorry，兄弟，睇開啲啦，女人總會有下個。」
 
「即係會唔會？」
 
「屌！」
 
「你呢個回答係代表會定唔會？」
 
「......」
 
寧願Kenny當我沒說過吧。