因為一次意外我獲得神奇力量可以隨心所欲，結果........: Ch.5 this is my show time (3)
大角咀 一號銀海高層某單位
「Harman，今次既成績比上次好，總共係賺左三十萬。」余立信開啟I-Pad把內裏一個製作詳細的PowerPoint展現出來。
「嘩，只不過係一個禮拜就賺左咁多錢，Chris你真係堅。」這個Harman就是在夜店認識那個鞋王的兒子馮力揚。
「其實我都係做左好耐功課，加左呢排個市又行得順至可以有咁既效果。」余立信自信一笑，他早在很久之前已覺得Harman奇貨可居所以極力巴結並替Harman在股票市場投資買賣，憑其隨心所欲的能力一直穩賺不賠。
「嗱，下星期個船Ｐ預埋你，到時我介紹啲朋友俾你識，佢地都好有興趣投資，我聽佢地好似玩嗰啲咩私募基金，好好賺喎，你咁勁可能有機會同佢地合作呢。」
「哦，係咩？咁真係要見識下喎。」余立信雙眼閃出一陣異采：「不過炒股票期指都唔及得你本身公司咁好搵啦。」
「你講我公司？哦，騰風…果間係daddy既公司同我一啲關係都冇。」
「點會呀，你話哂都係太子爺，集團分區經理喎，點會冇關係呢？」余立信裝作不解道。
「虛名之嘛，我都唔識做生意，做愛我就識。Daddy成日鬧我唔理公司啲野，咁我真係幫唔到咩手。」
「真係一啲野都做唔到咩？」余立信煞有介事地問道。
「好似前排有間公司搶左我地一個好重要既供應商，daddy依家頭都大埋，佢問我可以點，哈！我點知點呀？」
「唔，你指既供應啲係咪供應原材料整皮具呀？」
Harman點頭，其實他都不太清楚。
「我有個客係大陸開廠都係供應D原材料俾人，可能有機會幫到手。」余立信立即建議道，他似乎未卜先知。
「係咪真呀？」
「我試下問個客，今次就當係你幫手如果成功既你阿爸一定對你另眼相看。就算唔得都叫出過一分力呀。」
「Chris不枉我當你係好兄弟，下個禮拜唔好甩底，我安排啲索女同靚酒黎，我地兩兄弟拍住上。」余立信聽到Harman對自己建議非常受落不禁燦爛一笑。
因為所有事情都盡在他的掌握之內。
XXX XXX
興隆銀行主要分為東南西北四區共三十九間分行。作為全港三大銀行之一的每年有會派四名客戶經理參加全港投資研討會，今年在東區分部選中了近期成績突飛猛進的楓葉街分行挑選一名代表參加。
許經理對於今次委派誰去參加這研討會費煞思量，本來分行銷售收入來源大部分源自玲姐一派她必然是最合適的人選。可是玲姐過往不斷插手人事管理令他早已不滿其越權行為，如果今次的研討會由她出席日後定必氣燄囂張。
這時余立信的冒起令他決定了人選。
這個小子從前甚麼不甚起眼，但估不到近年成績竟然令人刮目相看，而且為分行奪得不少獎項，如果以他作為代表的話也不無說服力，高層亦十分贊成提攜年輕一輩出席，選擇余立信百利而無一害。
「許生，搵我有咩事？」余立信受許經理的召見到達經理房。
「坐啦，Chris。呢排做野做成點呀？」許經理以閒聊打開話題。
「幾好幾好，都好順利。」余立信不知許經理用意何在所以說話都比較機警。
「你緊係順利啦，一個月就做左成年既Target。」許經理笑笑道：「當初我升你唔升Micheal證明我眼光獨到啦。」
余立信心想：我果時爆到豬頭你緊係要升我啦，但仍然虛偽地感謝：「許生對我既栽培我知道既，我會比心機繼續努力。」
「人望高處，依家都係後生仔既世界。知唔知每年公司都會派幾個RM去投資研討會啦。」
余立信對這詞彙當然不陌生，多少客戶經理就是以出席研討會為目標！這可意義重大，一旦出席研討會將會成為總部青睞，前途一遍光明。
「總部好欣賞我地今年既表現，特別安排我地分行派其中一個代表參加會議，你有冇興趣？」
「呢個…呢個會議唔係應該俾啲有份量既RM參加咩？好似玲姐至係合適既人選，我何得何能擔當大任呀？」余立信嘴裏當然謙讓，但內心已經興奮得不可開交。
「總部想搵啲年輕既RM試下，而你幫總行攞過唔少獎項所以絕對有資格參與，問題係你想唔想啫。」
「想！緊係想啦，但我去會唔會俾人話唔夠班？」
「我叫得你去就緊係夠資格。而且公司會挑選其中一個代表上台演講，離宜家仲有幾個月時間你就準備下，呢啲機會唔係成日有。」
「多謝許生，我會俾心機！」余立信喜出望外,眼神閃出一種異采，他的野心火焰此刻膨漲至高峰。
「Chris，我一直睇好你既，做Sales唔可以做一世，遲啲你可能會做管理層，咁個人修養就應該更進一步。」
許生呢番話係小我經常唔返工，定係俾佢發現我係度培植勢力？
「玲姐呢，仲有幾年就轉去其他部門等退休，可以既咪唔好咁多磨擦囉，其實呢間分行你都好受歡迎啦，後生仔都係低調啲好。」
許經理這番話無形是站在默許了余立信一方，他知道自己在這分行權勢已到達頂峰，往後的目標就是總行內部的位置。