因為一次意外我獲得神奇力量可以隨心所欲，結果........: ch.6 我嘅人生應該活得更好(3)

Anna滿心歡喜跑向蛋糕店等候，看著四周陳列出的甜品糕點她非常期待一會兒訂製的蛋糕是否合自己心意。

店員把Anna訂製的蛋糕端出，這個蛋糕是為了慶祝四週年的拍拖紀念日而花了一個月時間學習並配合店裏的特別機器製作，看到這製成品Anna滿意得流露比蛋糕還要甜的笑容。

攜著蛋糕輕輕地走到男友的家在途中不斷回憶過往四年的甜蜜時光，今天Anna告訴男友已經在一間高級餐廳訂了位置慶祝，但其實她特別請了假偷偷到男朋友家準備親自下廚，當男友辛苦了工作一天發現家中已準備了最愛吃的餸菜一定是個驚喜。

當Anna看到一輛熟悉的車子停泊在附近內心立刻疑惑起來：「點解佢架車會喺度嘅？梗係唔記得帶啲咩啦，真係大頭蝦。」

但當她看到一個女子站在車子一旁等候時，腦海開始有些想像浮出。





個女仔……係佢同事……會唔會係咁啱一齊出去做嘢……

當男友回來並親密地摟着那女子回到居所那想像似乎變得真實了，Anna仍然努力欺騙自己嘗試為男友尋找藉口，這個女可能唔係太舒服……佢太好人諗住帶返屋企休息……冇可能嘅……四年嘅感情……佢唔係啲咁嘅人……

男友和那女子親吻數十秒後才擁著一起上了居所。十多分鐘後她終於鼓起勇氣致電男友：「你喺邊呀，今晚幾點收工……」

「我依家開緊會好忙啊，可能要遲少少先至走，不如你去攞位先……唔同你講住啦……」

「唔緊要……」Anna掛斷電話，靈魂彷彿被抽離呆呆倚在街道的牆壁，幾分鐘後身體唯一有反應的是淚線。眼淚沿著眼眶流瀉，Anna右手掩著嘴巴忍住不讓哭聲崩潰，左手還是牢牢地拿著拿蛋糕。





他說謊他騙我他說謊他騙我……

身體晃如餘下空殼的Anna在附近的街道徘徊，唯一有意識做的事就是把那蛋糕拋到垃圾桶裏。

XXX XXX

當許經理已確認余立信將會代表興隆銀行在研討會上發表演講後他馬上把這消息向靜婷分享。

「呢個研討會對你來講真係好重要喎，我見你又專登訂套西裝有練習演講。」靜婷單是看余立信的言行就知道他十分重視這個聚會。





「梗係啦，到時好多金融界嘅精英雲集，總行嘅阿head都會睇住我喺台上演講嘅英姿，哈哈。」

「但唔係有其他RM參加咩，你又知一定係你上台演講？」

「許生早已幫我安排好哂，其餘嗰啲RM聽都未聽過唔慌勁得去邊啦，總行都想搵個見得下人嘅上台啦。」

「我覺得你呢個許生表面上好似好幫你咁。但係佢未必信得過囉。」

「你諗到唔同我諗唔到咩，我都係利用緊佢幫我升上總行之嘛，呢間分行所有人已經係我掌握之中。」

余立信目空一切似乎令靜婷感到不安：「信，有啲說話可能你會唔鍾意聽。呢幾年你係升得好快，我覺得你驕傲左好多仲有啲睇唔起人。」

余立信無言。

「唔係話潑你冷水呀，你升得愈係高既時候就會愈自滿，當有一日跌返落黎既時候可能翻唔到身。」





余立信在想：你咁都唔叫潑我冷水，我如日方中又有隨心所欲既力量照住。我會跌？你睇下李嘉誠會唔會跌？靜婷的一番話令他感到身邊的人原來不支持自己。

身邊的人……還有我的家人……他們會支持我嗎？