我係個電台DJ，每晚都做個無咩人聽嘅節目: (七) 墮進黑暗的女孩 (一)

「XXXX XXXX 阿卓電話。」節目完了後，Sally還是給了我。 

「唔該曬喎！」
 
「你諗住點樣做？」 

「呢排我屋企都想裝修下，我信唔過出面啲裝修佬。」 

「吓，咁都得？」





 「走啦，去拎車。」送她回家，不經不覺也成為我工作的一部分。 

「你覺得咁樣真係可以幫到佢地？」在我駕駛時，她問。 

「唔知啊，至少可以過到呢關先啦。」

 「你知唔知佢地接一單工程點拆數？佢最後袋到幾多入袋？ 況且人地都係打黎同你呻下，有必要做到咁？」她如連珠炮發般問了這些問題。 

「其實我聽今晚呢兩個電話之前，我都已經唔相信而家仲有未變質嘅愛情。或者現今嘅愛情兒戲到令我唔覺世上仲需要有真愛。我幫佢地唔係因為佢地可憐，而係因為我想為佢地帶俾我嘅呢份希望貢獻一啲啲。」 我也不敢想像，說著是開導別人，但最後卻被打來的他們給啟示自己，或許是我把世界看得太悲觀，是他們告訴我應該改變一下看事情的角度。 





「哧。」她笑了。 

「你都識笑架咩？」我問。 

「我只係笑你傻，因為一個電話將成間屋裝修，應該冇人癲到好似你咁。」 

「仲癲啲都仲得。」說罷我便猛踏油門，在深夜無車的街道馳騁。

 「喂..喂，想問下係咪裝修公司？」翌日的下午，Sally便到了我的家，為我撥了這一通電話。 





為什麼要這樣做？我想是因為不想太早給他知道我的身份吧。 

「係啊，你係睇到我地公司嘅傳單？」撥通了後，聽筒傳來了阿卓的聲音，然後我開啟了擴音器。 當我還在躊躇著該如何解釋從哪來他的電話，幸好他自己替我解了圍。

 「冇錯啊，方唔方便接呢單生意？」她問。

 「可以啊，幾時方便俾我上黎睇睇？」果然為了掙錢，甚麼工程也得接了下來。

 他們約好了時間後，我便把屋子交給了Sally，為我負責與阿卓磋談。 之後我在街上遊逛，眼光不期然放在不同的情侶身上。 有些肩並著肩，狀甚甜蜜。 有些卻貌合神離，各有各走的。 

「問世間情為何物..係就係老套啲，但係真係講得好啱，我都唔知究竟係何物。」我喃喃地說。

 有些人為了個情字要生要死，有些人花上了一生也不能把它好好的了解個清楚。

 但我相信，像阿卓和阿言這些案例，只是冰山一角，日後我定會遇上更多不同的愛情煩惱。 豈料，這個晚上的節目，卻聽到一段與愛情扯不上關係的電話。 





「徘徊太子道，歡迎大家喺呢兩個鐘頭打黎講低你嘅煩惱，如果有歌想點都歡迎講低。我地熱線係1864XXX，而家收聽第一個電話啊，你好？」 

「太子哥你好。」一把頗年輕的女聲從話筒中響起。

 「欸，太子得啦，哥前哥後就三分險啊。」 

「我叫阿彤。」她無視了我的詼諧。

 「阿彤你好啊，聽你把聲幾後生，你幾多歲？」 

 「我十八歲，仲讀緊書嘅。」 

「你打黎係想講下生死？」





 「係。」

 「十八歲就開始諗呢樣？你個人好早熟？」 

「唔知算唔算，可能我屋企背景令我對呢啲野有興趣啦。」 

「你屋企？」

 「我屋企係做殯儀嘅。」 

「即係賣殯葬嘢果啲嘅？」 

「冇錯，所以會成日跟住老豆出入殯儀館。」 

「估唔到你咁後生都肯去掂呢啲，我自問就冇咁嘅膽。」我很怕進出殯儀館，我很怕面對死亡。 





「其實有得揀..我都唔想做呢樣..原來我都好怕..好怕。」

 「怕你仲繼續做？」

 「我打黎就係為咗咁，我想問下你意見。」 

「好啊，你問啦。」

 「事緣係黎自我一位朋友嘅死..」