【懸疑】《珍珠奶茶殺人事件》: ——第十八章：罪人——
熟悉的環境。
熟悉的四面隔音牆，熟悉的監視鏡頭，熟悉的桌和椅。
只是，這次我沒有笑。
在羈留室獨身一人，並太不難受。偶爾放空自己，寂寂空等也是個放鬆腦筋的辦法。
只是，我已經被扣留兩天，依然未知從何發落。
兩天說長不長，說短又不短，但足夠讓我回想到很多剪影。
與Shirley曾經到外地旅行、對著愛琴海擁吻、在天空之鏡上嬉戲、沙漠上騎驢奔馳......
美好的回憶，令人陶醉。
不過，也有痛心的回憶。
當Shirley患上癌病後，需要終日臥床，我亦為了昂貴的醫療費用，踏上殺手之路。
日復日，夜復夜，盲目地幹同樣的事：為那些恃有錢財，花大錢清除眼中釘的達官貴人當劊子手。
為的，就是金錢二字。
兜兜轉轉，直到現在，Shirley生了我的氣，我亦被警察硬生生抓住，算是報應吧。
我心甘情願，卻又極不甘心。
不甘心任由那個神秘兇手殺掉我的同伴、恐嚇Shirley甚至要取我命......我不能接受那人逍遙下去。
嘭嘭......
吚——
門開了，討厭又刺眼的光芒四射，伴隨而來的，是吳Sir的模樣。
「想笑就笑啦。」我淡然道：「你成功捉到我把柄喇，恭喜你。」
他沒有回應，亦沒有笑，只是抱著一堆文件坐在我的前面，然後把文件擺放桌上。
「超蓮既死，關唔關你事？」他單刀直入。
「唔關。」我說謊。
「綁架何雄心，係咪你做既？」
「係。」這個我不諱直說。
「咁分屍案，係咪都係你做既？」吳Sir一臉正經觀察著我。
「唔係。」我答：「不過你都唔會信架啦，反正人贓並獲。」
「我信。」
我驚訝的張張嘴，沒想過他會這樣回答。
吳Sir長嘆一聲，雙手合十的說：「其實我地喺捉到你之前，收到一個匿名電話，講出大圍車房有單謀殺案。」
匿名電話？
莫非兇手知道我必定會趕來，刻意想警方抓住我，困於監獄裡？
用意是甚麼？把我折騰一番後才把我殺掉？
「雖然報料人十分可疑，但我地跟隨左佢指示後，的確發現你牽涉喺呢宗謀殺案。再加上我地發現你非法藏有槍械，同埋綁架......你應該好清楚你既下場係點。」
我苦笑：「我知，我認命......」
「但係有啲野，我想問清楚你先，希望你合作。」
「......Ok。」我根本別無選擇。
「之前我跟蹤過你一排，發現你四處調查某啲事，雖然我唔清楚關聯性，但我肯定係關乎近排連續幾單既殺人事件。」
原來他的目的真是單單為了破案，找出真相，而不只是針對我。
「我的確係查到少少野......但係咁喎，你唔怕我就係個分屍兇手咩？」
「唔怕。」
居然...照他的說法，他肯定是掌握了某些證據，才可以確定我不是兇手吧。
「係死亡時間。」他看出了我的疑惑。
「？」
「從死者「妖女」既死亡時間，同埋大門閉路監視器拍到你進入車房既時間，可以肯定你唔能夠對妖女作出分屍既行為。」
「原來係咁......等等先？！」
「係？」
「大門既閉路監視器居然有錄影？我前一日喺車房既時候，所有閉路監視器既記憶卡應該都已經抽左出嚟喎。」
我肯定有人暗中搞鬼。
吳Sir皺皺眉，想了一想，還是如實的跟我分享資訊：「我地警方查過，車房係真係有十個閉路監視器，但當時只有大門果部裝有記憶卡，因此得果部機拍攝到案發時間既畫面。」
十個閉路監視器，只有一個放回記憶卡進去......
仿佛是想我們，看到大門拍下的景象一樣。
「咁拍到啲乜野？」我迫切的問。
他從桌上的文件紙堆抽了一張，推給我看，那是大門閉路監視器當時所拍到的畫面截圖。
我看一眼後不禁瞠目......
是一輛昂貴跑車「大牛」。
「Freeyon？」我問。
吳Sir聳聳肩：「架車係佢既，但係喺車行落嚟既人就包到實一實，唔肯定係咪佢本人。」
「咁即刻捉佢問話啦！」
「阿Sir做野唔駛你教！」他警告我一句，續說：「我地已經問左，不過佢話自己係比人偷車，唔認自己係相中人。」
「唉，不過佢比人陷害都唔奇。」我歎息，因為我也被陷害了。
「Paddy。」吳Sir忽然語重心長喊我一聲：「我可以比個翻身既機會你。」
「翻身機會？」我以為聽錯了。
吳Sir卻不像是開玩笑。
「同警方合作，一齊查出真兇，事成既話可以免你於罪。」
我眼睛也幾乎掉出來了：「但係我唔明...你係兵，我係賊，點解你會信我？」
「經我跟蹤你一排後，我可以肯定你係無辜既，而且我知道你有心想搵出真兇，所以想比個機會你......放心，我地會廿四小時全天候派人跟住你，你唔可能逃走得到。」
看來他很想我加入他們。
只不過，我應不應該應承吳Sir呢？......始終我有份陷害超蓮的，但他好像懵然不知，若果之後被他發現......
不管了，反正我也想挖出那個神秘兇手。
「一言為定。」我伸出右手。
他伸手緊握住我手。