【懸疑】《珍珠奶茶殺人事件》: ——第二十一章：所有嫌疑人習結！——
徐徐睜開眼。
眼前的天花板，刻現了意大利藝術風情的圖案，黃金色的繪畫讓人感覺置身其中。
我...莫非是死了，然後上了天堂嗎？
「醒喇？」
一把聲音從右扉呼喚著我，我才驚覺自己依然活著。
我從床上微微坐起身子，只見身處在一間寬敞豪華的房間中，而呼喊我的人......
竟然是何雄心！
我立即喘開被子，把身子退縮到床隅瞪視他。直冒冷汗的我，情況好比撞鬼一樣。
「嘩哈哈，睇你反應咁快，即係無事啦？」他開懷的笑。
「你...你想點？報復？」我不知為何聯想到妖女的死狀：「殺左我都得...但唔好太殘忍......同埋幫我照顧Shirley得唔得......」
「邊個話要殺你啊？」他反了我白眼：「頭先救你果個人都係我嚟架。」
「救我...？」
「你唔記得自己點解暈左拿？」
剛才有個神秘人把我弄暈，然後......
然後怎樣了？
「情況係咁架：我本身帶住兩個保鏢，諗住去搵你。但唔知點解好多人追住你，結果我地就要跟埋一齊跑，點知去到籃球場既時候，有個成身黑袍既人想對你郁手......咁我既保鏢咪大嗌囉，然後佢就跑走左喇。」
「你見到個兇手！？」我大驚：「知唔知佢係邊個？」
「鬼知咩...大熱天時包到個人實一實，點睇啊...」
「咁你地做咩唔追佢？」
「追住你都追到無氣啦......算啦......」
我歪歪頭，為錯失了捉拿兇手感到可惜，接著又是另一大堆問題：「咁點解你要搵我？點解你要救我？點解你要幫我？你唔係想我死架咩？我綁架左你喎？......」
「靜靜先啦Paddy，聽我講...」
「靜你老豆啊！......咦等等，你知道我個名？」
「唉，我起左你底架喇。本身搵你，就係想同你傾啲野，我無諗過報仇啊。」
沒有想過報仇......
此時，仿佛有千萬道金光從他身上散發出來。
我曾經把他綁架，脫光他的衣服，還要打他......他現在把我救了，更說沒打算報仇，只是想跟我聊一聊......
神仙...他絕對是神仙。
「你咪鬼咁淫咁望住我啦...」何雄心失笑一聲：「知你會疑惑架喇，其實我咁做係因為知道左你綁架我既原因，同埋之前既來龍去脈。」
「你真係知道？」我不信。
「原因係你地殺左超蓮，然後以為我係個委託人，想反口唔比錢仲殺左你地呀嘛！我理解既，我唔怪你地。」
「係...」我忽然有點兒慚愧的垂頭。
「呢個亦係我搵你傾計既原因，我想你話我知，邊啲人有嫌疑想殺你。」
何雄心拍拍手掌，有位束馬尾的工人隨即從門外進來。她的手中捧著托盤，盤上有兩個盛滿茶的陶杯子。
「放喺呢度。」何雄心揚揚下巴指往床邊的矮櫃子。
工人聽命的照做了，放下後識趣的離開房間。
他拿起杯子凝視向我：「我都有興趣想搵出個真兇，只要你同你既同伴肯向所有人承認，係你地殺左超蓮，我可以叫哂所有嫌疑人嚟，互相問話，直到真兇問出嚟。」
「咁痴線...？」我對何雄心的鬼主意感到驚奇：「問題係想殺我既人包括首富李加鼎喎...」
「無問題，我會叫到佢過嚟。」他十拿九穩的道：「反正，我諗佢都想見下你地既......嘻嘻，畢竟你地無啦啦殺左佢個寶貝女喎。」
從他那雀躍的眼神去看，他似是想玩玩偵探遊戲，查出真兇......有錢人果然是太閒沒事幹嗎？
不過也好，倒是幫了我一把。
我拿起另一杯茶，跟他乾個杯：「就咁話。」
「好，另外呢，你而家可唔可以一五一十話我知案件既細節同疑點？」
「無問題。」
我把頭三次連環死人的情況重身敘述一遍，各種細節例如留下的奶茶信息、記憶卡和閉路監視器的事也說了出來。
何雄心聽後深思了一會，然後逕自點頭。
「唔...我明白喇，我出去準備一下，你休息多陣先。」何雄心鬆容離開房間。
他明白了嗎？明白了什麼？
我呷了茶，放下以後檢查手機，只見十八條未接來電，還有吳Sir留下的信息：
「誘餌，馬上回電我！」———58分鐘前
「啱啱發生咩事？」———42分鐘前
「點解你會喺何氏家族大宅入面？」———16分鐘前
「再唔回覆，我會即刻派人逮捕你！」———4分鐘前
我索性關掉電話。
難得有個破案的時機，怎能錯過？
過了約半小時，此時房間的大笨鐘指針擺向七時。撲鼻的香氣從門外透進來，我的肚子不禁咕咕作響。
咯咯...
有個穿著一身女僕服裝的年輕女子敲門進來：「Paddy先生，晚宴差唔多要開始，請先跟我嚟換一換衫，再前往宴會廳。」
「晚宴？」她指的應該是嫌疑人的聚會吧。
我踢開被子，瞧瞧自身的衣著，庸爛不堪。
「都啱既，換件衫好啲。」我尷尬的搔搔頭。
「呢邊請。」女僕禮貌地揚手。
她帶我去到堂皇的更衣室，過百件男裝衣服整齊擺放櫃面，還有西裝大衣掛在衣架上，我差點以為自己去了服裝店。
結果我選了最平樸的白色裇衫，黑色西裝外套和西裝褲，打了一條寶藍色的領軚，
我照照鏡子，連自己也有些驚訝，看起來簡直是個金融財俊，是個上等人。
不知道Shirley看到我這個樣子，會覺得怎樣呢？
「所有賓客基本上到齊，請跟我嚟。」女僕催促我。
「喔。」
沿著狹隘的走廊，好像選手步入鬥戰場一樣，我慢慢走到去宴會廳。
意式設計的宴會廳，湛麗的畫作和雕塑遍佈，中央是一張放滿酒水的雲石長桌，圍繞桌子的座位有何雄心、阿邪、眼鏡娘、freeyon、還有一個陌生臉孔......
「佢係白慄山莊者既團長，白山。」何雄心向我介紹，然後目光不其言投到我身上：「嘩，你成個人唔同哂喎。」
「多得你件靚衫啫。」我隨便說句客套話。
白山極不耐煩：「喂而家點架？仲要等李加鼎？憑咩果條友可以遲到先？」
「唔緊要啦，為左查明真相嘛。」何雄心回頭答道，沒有生氣，反而整臉是期待的樣子。
「拿拿聲啦，我真係唔想繼續對住呢個二五仔。」白山眼神直指阿邪。
阿邪一聲不吭，垂頭喪氣。
Freeyon瞥一眼手機，遂望向大門：「爸爸應該到架喇。」
話剛說完，沉重的大門便打開。
映入眼簾的，是一位年過七十的老人。他滿頭卷曲的白髮，撐著鳥頭拐杖，卻有著攝人的氣燄。
他的身後有近十個保鏢，通通戴上墨鏡穿上西裝。
我只看一眼，便馬上憶起之前九龍灣那群西裝傢伙，他們也是穿著相同的服裝。
我回頭看看何雄心，只見他一瞬露出恨恨的臉容，卻又旋即換回笑靨。
「請坐請坐。」他說。
李加鼎沒理會他，逕自找了個主席位子坐下。
他打量我們眾人，然後冷冷道：「哼，呢度坐滿左我最討厭既人，如果唔係為左搵出殺我個女既委託人，我真係無可能對住你地呢鼠輩。」他說的所有人當中，包括了自己兒子Freeyon。
「講咩呀你？死老野！」白山彈起身拍枱。
「唔緊要。」何雄心安撫一下他，繼續今日的節目：「相信大家都對在座各人有認識或者調查過，應該好清楚知道對方咩人啦？既然人齊，我地就開始喇。」
「開始？而家要點樣做呢？」眼鏡娘問。
「好簡單，由於今次Paddy：即係任命殺超蓮既兇手之一，差啲比個神秘連環殺手殺左。而個神秘連環殺手好可能喺我地之中......一陣要做既，就係等Paddy講出我地每人既疑點，我地再商討邊個係真正既神秘連環殺手。」
我點點頭，如果神秘連環殺手找了出來，神秘委託人的真身亦呼之欲出。（甚至很大機會，兩者根本是同一人）
「最後提提大家。」何雄心也回到座位，拿起紅酒斟進透明杯晃晃：「搵出真兇後，我地呢度係會行私刑，直接處決兇手。」
直接處決？
他的臉部表情沒什麼變化，好像只是說了些無關痛癢的瑣事。
總覺得這個比我們殺手更瘋狂的富商何雄心，老謀深算著些什麼。
我開始嗅到血腥的氣味了。