【懸疑】《珍珠奶茶殺人事件》: ——第二十四章：偵探遊戲（三）——
吳Sir先是錯愕，然後臉色驟變。
「亂講！睇嚟都係要即刻捉你翻去。」
「唔係指你啊。」我手指輕輕一屈，指往吳Sir身後的大門。
「咩意思？」
「我意思係，兇手根本唔喺呢度，而喺出面。」
「下？」眾人不解，何雄心幾乎要跳起來：「但明明你話嫌疑人到齊哂喇喎？」
我乾咳一聲，遂回答道：「經過頭先既一番討論，以及細心既思量下，我發現我地由最初既時候，就向左一個錯既方向查。」
「啊？」就連一直噤口不語的阿邪也叫了出來。
「由老王被燒死一刻，不斷就有新既調查方向湧現。首先係神秘委託人既身分，然後係奶茶裡落炸藥、委託金、奶茶文字、Freeyon架車、阿邪既口頭禪......總總線索，聽落都對案件有好大關鍵，好似係不可忽略既證據。但其實講到尾，兇手係想以新既「線索」嚟誤導我地，等我地忽略最初既兇案。」
「你呢種講法......」眼鏡娘托起圓鏡鏡框：「係咪好似一條數學題咁，睇落好似係幾何問題，等人一直以呢個方向拆解，但事實係函數既數學題？」
「我知喇。」何雄心恍然大悟：「我曾經睇過東野圭吾既《嫌疑犯X的獻身》，個幫兇都係以不在場證據誤導警察架。」
「無錯。」我頷首：「所以撇除複雜繁瑣既線索，只係睇翻我地啱啱對超蓮落毒手後既情況，有更明顯既疑點會出現。」
阿邪聽得困惑起來：「但係當初我地接到信息後，同時返去搵老王，之後就見到佢條屍......無咩奇怪既事發生喎。」
「嘿嘿，因為果陣我地已經被誤導左喇。」我在宴會廳來回踱步，抬頭望玻璃燈，回想起那時的細況：「果陣時我地啱啱犯完案，即刻就傳出老王既死訊，我地好自然就會將兩個不相干既案件聯繫一齊，然後就諗係咪委託人或者李氏家族所做。只不過，細心一諗......當時死果個係咪真係老王？」
「下？！你意思果條燒到黑哂既屍體，並唔係老王本人？」白山也答嘴進來，顯然他也是做足功課。
「係...首先條屍體全身燻黑，僅餘無燒到既手，仲要斬哂手指，令到我地難以分辨屍體身分。只不過，老王曾經send過短訊比我話佢喺大圍車房，加上佢經常配戴既綠色玉戒放左喺屍體旁邊，我地第一時間就會認為佢就係老王。」
吳Sir抱抱手，同意的點頭：「的確...我地雖然收到老王既死訊，只不過鑑定既法醫根本唔能夠確定佢身分，我地其後搜索過老王大宅亦唔見相關證據，所以只能當佢係失蹤人口。」
「所以老王就係個兇手！」Freeyon興奮的說，仿佛沉冤終於得雪一般。
「但係點解佢要咁做呢？害完超蓮，再害我地呢啲負責收錢殺人既殺手？」眼鏡娘問。
「一貫技倆：誤導，故弄玄虛。」我拍了拍手指：「老王目標應該係李氏家族，佢首先聲稱有委託人叫我地殺超蓮，令我地以為佢做翻一貫中間人既角色......但真相係，佢就係個神秘委託人。佢殺我地既原因，只係為左留低奶茶既證據，等所有人以為李氏家族想報復，從而陷害李氏，等警方甚至社會大眾覺得李氏家族係殺人家族......我地呢啲收錢既殺手，只不過係替死鬼。」
「嘩，實在係非常狠毒既做法。」吳Sir不禁失笑，他笑的是老王如此精細的犯案手法：「我地關於連環殺人案既調查方向，的確係針對於李氏家族，所以上次放你做誘餌出嚟既時候，本身就係想睇下李氏家族會點。」
「然後李氏家族真係派左人嚟，想捉拿我。」我苦笑的目望李加鼎：「如果果陣你啲手下真係殺左我，咁你地就真係水洗都唔清喇。」
李加鼎沉吟一聲，略有所思，續說：「估唔到佢會做到呢個地步。」
「你同佢究竟有乜野十冤九仇？」我問。
李加鼎望向我們所有人，眼神是苦澀的，他徐徐開口：「一切都係因為一次誤會。」
「誤會？」白山狐疑：「你地識架咩？」
「點止識咁簡單，我地曾經好熟架。」李加鼎唏噓的說，接著緩慢地掃看每個刑警：「咁多位阿Sir，介唔介意避一避席先，我地想傾傾私人事。」
吳Sir頻頻搖頭：「緊係唔得啦，而家案情去到咁關鍵既時候，你要我地離開，我地點做野呀？」
李加鼎把眸光擱於吳Sir身上，淡淡一說：「你想代表香港警察，得罪我地三大首富？」
簡單一句話，乍聽腔調不含態度，卻是有著命令的壓迫力。
吳Sir看了看他，無可奈何，唯有帶隊離開。
同時間，我亦拆開手機把偷聽器取出，拋在地上一腳踹破。
不會讓你們有機會再偷聽。
把警察趕離現場後，他向背方的西裝保鏢耳語幾句，保鏢立即奔出大門。隔了半响，那保鏢拿著一本發黃的筆記回來。
李加鼎把筆記接了上手：「呢本就係老王既記帳簿。」
「原來喺你度！」
我恍然大悟，當時老王傳出「死訊」後，他的住宅立即便爆出偷竊事故，原來是李加鼎做的好事。
他把帳本從後至前開始掀動：「睇佢近期既委託人記錄，眾所週知，基本上全部都係何雄心搵佢做中間人。」
「唔......」何雄心默默點了一下頭。
「只不過再之前既呢幾版，請大家望下。」
李加鼎把帳本反過來讓我們看，這些是頭幾頁的委托項目，應該是五至六年前的紀錄。
「欸？點解上面全部只係寫左所用既殺手，無寫明委託人既身份既？」阿邪發現委託人一欄是空的。
「但係每版既右下角都盦左個紅色既印仔喎。」眼鏡娘看出了端倪。
「嗯嗯...」李加鼎摸了摸有點化掉了的蓋印位置：「呢個印，其實係代表住我既許可。」
我走近些仔細一看，果然印章上烙現著李加鼎的名字。
「喺何雄心搵老王做中間人之前，老王曾經係我御用中間人。佢做野心思細密，行事前考慮所有因素，睇人亦都睇得好準，所以我揀左佢。以往有一段時間，好多人想對我不利，如果唔係有佢幫我暗中解決敵人，而家既我絕對無咁既成就，甚至可能已經死左。」
「咁之後為咩反目成仇？」我把左手依靠桌角。
苦澀的臉再次浮現於李加鼎臉上：「因為...當時其中一個想攞我命既人，就係佢個仔。」
我驚疑的張張嘴。
跟老王工作以來，從來沒有聽過他提及家人，更別說有個兒子。
「繼續講，繼續講。」何雄心宛似聽床邊故事的小孩，催促著李加鼎。
「老王個仔曾經兩次潛入我公司，想刺殺我。迫於無奈下，我只可以叫佢幫手搵人殺佢個仔，但當然啦...佢又點會肯喎。」
「然後你就殺左佢個仔？」Freeyon睜眼看著自己老爸，看來連他也不知道有過這件事。
「唉...」李加鼎不知道已經嘆息多少次了：「我最後搵左另一個中間人幫手，想暗中處理佢，但係果個中間人搵左個笨手笨腳既殺手..好似叫喪堅，條友竟然大無私樣咁喺街上行兇，仲殺埋佢老婆。」
「哈。」阿邪偏偏頭：「難怪佢會有份參與今次殺超蓮行動啦，原本老王一早已經想佢死。」
「自此以後，我地就反左面，再無聯絡......我知道佢對我恨之入骨，但我無諗到隔左幾年，佢居然會想陷害我一家。」
「君子報仇，十年未晚啊。」眼鏡娘也是感慨的道出一句。
「而我諗老王搵得你地，應該唔係純粹既巧合...而係因為你地都曾經幫過我殺人。」李加鼎說。
「啊...係...肯定係啦！阿邪你之前就係幫李加鼎先比我地踢走啫！」白山指著阿邪，手指一直上下抖動。
「諗諗下，我好似都曾經接過類似既任務。雖然係經由其他中間人，所以唔知委託人真身，不過暗殺對像好似就係李氏家族既敵人。」眼鏡娘說。
「我都係...」我同意眼鏡娘，過往曾經接任過高額任務，暗殺對象正正是李加鼎的眼中釘。
但我逐即產生疑問：「但係我唔明，你地幾個富豪明明係仇家，又會花錢搵中間人幫手殺人......點解你地從來唔會互相派人暗殺對方？」
「好簡單啫。」白山笑著答：「殺下啲小嘍囉就話得啫，我地幾個大富豪如果對另一方郁手，實會搞到世界大戰架。」
「噢...都係喎。」
富豪原來也不是只為了權勢利益，便不顧後果的笨蛋啊。
「一切既謎底基本上解開得七七八八，而家要做既事就係搵老王出嚟。」李加鼎拿起拐杖，具氣勢的敲了敲地面。
「事不直遲啦。」何雄心也站起來。
「咁樣講，今次算唔算我地三個破天荒合作？」白山聳聳肩跟李加鼎和何雄心說。
「只此一次。」李加鼎態度依然冷淡。
我、眼鏡眼和阿邪面面相覤，不禁同步的噗哧一笑。
真兇找了出來，李加鼎和何雄心亦好像沒有怪罪於我們的意欲，似乎我們暫時安全了。
我們一個個站起來，準備從大門離開宴會廳時，手機陡然作響。
我一邊走一邊接聽電話：「喂。」
「救命……」
是Shirley的聲音......我立即駐足，神情大變。
手機的另一方，然後換了個人接聽電話...是一把既熟悉又蒼老的聲音。
「唔想佢死既話，就照我既說話去做。」