中五的下學期在農曆年假後正式開始,各樣學界比賽重新展開,心如和琳必須回到辯論隊,而雯亦因爲排球隊的訓練需要從陽光補習社退下火線。

足球校隊因為不夠人用(一些各樣運動都出眾的人都去了參加籃球,因為在學校訓練較容易受關注),也把我們三個逃兵叫回去,特別是傑,跟我們兩個不同,他一直也是足球隊的主力,這一年的學界對他來說是十分重要。

當然,學會也是會繼續營運,只是現在一星期只開一次,中堅分子變成只有我們三個和因為年紀小、在辯論隊較少出賽機會的琳。

雖然我們幾個越來越忙,參加我們學會的人數卻越來越多,大概跟老師在頒獎典禮上做的大力宣傳很有關係吧。當然,也有其他成績較好的同學加入我們,所以即使要處理的問題比以前多了,也不至於太過吃力。

但因為忙於兼顧陽光、足球和自己的學習,再加上心如變回了那個忙得恐怖的心如,我和她的距離好像又拉開了不少。即使是M2課,老師也把座位重新排了一次,基本上除了M2堂下課後的幾分鐘外,我們兩個根本沒有機會做交流、我也完全沒有WhatsApp她的藉口。



「你最近還好嗎?」M2課後我問她,雖然我不認為她會喜愛看少女漫畫。
「唔好呀,攰到抽筋,好掛住你哋呀。」她整個人伏在桌面,側側的看着我說。

「忙緊比賽?」
「嗯,超忙。日日放學都要做Trainning 同Preparation直到去晚飯,夜晚又要練琴,就快訓教都無時間。」

「唔好用壞自己個人啊!我覺得你應該要訂立目標比自己。」我說。
「嘿,例如呢?我本身就有好多好多好多目標啦喎。」

「啊…唔係你平時嗰啲。你平時嘅目標係人地比你,唔係你比自己。」


「吾…我有咩想做呢?」她又陷入沉思。
「例如一點前訓教?」我說。

「太難做到啦,有時十一點先返到屋企,不如你叫陳sir唔好比咁多功課啦。」
「喂,你係黎心如喎,你唔做功課邊個老師敢鬧你啊?」
「邊係啊!」她笑了起來。

「咁兩點前訓,然後每日逼自己早一分鐘訓,咁樣兩個月之後就可以變成一點訓。」我提出意見。

「循序漸進,符合實際情況!咁一年之後我未要八點訓教?」


「係啊,咁樣就唔洗成日去同Jayden食埋晚飯先返屋企。」
「喂!你呷醋?」她用好奇的語調問。

「得鬼閒呷醋。不過你成日咁晏先返到屋企,屋企人唔會鬧咩?」
「唔會啊,屋企都無人!」她說。
「無人?」我心想該不會是甚麼暗示吧。

「無人啊,佢地上年退休返左英國。而家屋企得我一個住。所以好輕鬆好舒服!」
「果然係愛好自由嘅候鳥。」

「嗯,但最近咁忙,又變返有啲透唔到氣。」她嘆氣。
「吾…我唔知嗰種感覺係點。」我說。
「你可以試下!我地而家一齊試下閉氣。」她建議。

「咁變態?」


「咩變態啊,快啲快啲!三、二、一!」
「……….」我努力閉氣了十多秒,「哇頂,唔得啊好辛苦,我輸啦我輸啦。」

她卻毫不著急地重新打開氣門,靜靜的呼吸著。

「小氣鬼!剩係得十秒!」她笑著說。
「唔係講笑,我頭先直頭見到白光…」我說,「老實講,你係唔係殺手家族成員,自幼做呢啲訓練?」

「係啊,你試下唔努力讀書,我冷面殺手黎心如可以一手斬甩你手臂!」她裝著冷酷的說。

看到她這個樣子,又說這些中二病的說話,不知為何我禁不住笑了起來。
「唔准笑我啊!」

「等我都教你一個方法啦,可以一秒變開心。」說罷,我站起來:「吸氣吸上頭殼頂,呼氣呼到落腳指尾!」我紮起馬步,大力吸氣,閉氣,然後再呼氣,雙手做出運氣功的架勢。



「係咪真係得㗎,好似傻仔呀你真係...」心如看見忍不住笑了,笑得滿面通紅。

「根據生物學嘅原理,人腦會因為大力吸氣而充血,當腦部血液流通嘅時候,全身都會釋出一種叫安多酚嘅化學品,呢種化學品可以幫助我地暫時逼出痛苦,然後只要我地喺呢個時候將快樂能源注入體上,再配上合適嘅拍檔同你拍住上運功配合,自然就可以變成一個快樂長門人!」

「你有讀Bio咩…你係邊到學嫁?」
「未快樂長門人囉,暑假朝朝起身我都會睇。」
「咩嚟嫁…好唔可靠!」

「你都傻,啲阿婆活到七、八十歲就係睇呢個節目,唔係你以為靠政府公營醫療系統?快啲試吓啦,呃你做咩。」然後作狀要拉她起身。
「得得得,我試我試!唔好嬲!」她笑着站起來。

「嚟啦,吸氣吸到上頭殼頂,呼氣呼到落腳指尾!噓!噓!噓!」她跟著我的節奏,擺出運功的姿勢,還雖然努力忍著,最後還是忍不住笑。
「唔得,真係好蠢啊!」

「快啲啦仲笑!得我一個運功我會精疲力竭而死嫁。唔係你估啲阿婆點解要成日行落街搵阿伯?」



她跟着我的做法,深呼吸了好幾次。
「真係好似舒服啲喎!」
「話咗㗎啦!」我看見她的笑容,頓時覺得她的幸福比我的快樂緊要得多。

「多謝您。」她笑得很甜,就和我的心情一樣甜。
已有 0 人追稿