[高中][少甜]《如陽光伴我》: 四十二，有關友情、親情、愛情的那些事（下）

第三件事，是在晴放榜之前一晚。

「我今晚唔想自己一個瞓啊。」晴說。

「我可以等你瞓着先走。」

「你可以留喺度喎。嫲嫲唔會介意！」

認識我這一年半以來，她一追努力的追趕着自己的夢想和目標，近乎半點都沒有鬆懈過。



我一直告訴她，天道酬勤，其實我自己對於這四個字也有一點懷疑。

我們都只是普通人，沒有太多上天的眷顧，給我們的甚至更多是不合理的挑戰和難關。

「有冇信心？」這句廢話已經不知道說了多少遍。

「嗯嗯，我對自己冇咩信心，不過我對大哥哥你有，你咁俾心機教我，我諗爛船都有三分釘掛。」

「喂，放榜之後幾日你就18歲啦，仲大哥哥？」我說。



「咁應該叫你做咩好啊？」

「直接叫我個名掛，例如蠢材、變態佬。」

「嘻，蠢材乙。」

「點解係乙？」

「因為我係蠢才甲。我排第一，你排第二。」她笑著說。



她躺在床上，閉上眼，不知道在想些甚麼。我坐在床旁邊的椅子，倚着她。

「你諗緊咩啊，蠢材甲。」

「諗緊如果聽日唔夠分入大學咁點算...」

「點會呢？」

「咁真係有可能㗎嘛，你會唔會覺得我好廢，跟住唔想再理我？」

「如果你真係唔夠分嘅話，你讀Asso我就幫你補Asso，你repeat我就幫你補到你下年再考！」

「吾...咁都幾好喎，咁你就可以一路留喺我身邊，唔使返去歐洲。」

「你真係冇改錯名。蠢材。」



「真係蠢到爆，我點會鍾意你嫁呢？」她笑著說。

「入到大學之後，你會見到好多好叻好犀利嘅人，到時候你就會覺得我根本就好平凡，甚至討人厭。」

「你唔記得左我同你講過有關劇集嘅事咩？」

「啊，當然記得。」我說。

「我都唔係女主角，所以我唔需要一個男主角。」

「咁你需要嘅係點樣嘅男仔？」

「同你一模一樣嘅。」



「有啲難度，兩個人又點會一模一樣呢？」

「咁所以我需要嘅只係你。」

「蠢材。」我說。

「八月你打算做啲咩？」我問。

「媽咪想我去佢屋企試吓住一個月，同細佬相處下。」

「咁你覺得呢？」

「吾...可能會住兩三日。我唔捨得要嫲嫲自己一個喺屋企，」她搖搖頭說，「而且我相信老竇終有一日會返嚟屋企，甚至可能係好快嘅事。」

「嗯。」



「如果佢返屋企嘅話，我諗佢第一時間一定會好想見到我。」

「一定係。」

「我一直咁等佢。除此之外，可能畫下畫，返下part-time，唔想浪費左個暑假。你呢？」

「就好似之前同你講你咁，如無意外，過埋聽日我就會買機票，我想去歐洲一段時間。」

「單程機票？」

「嗯。大概。雖然唔係幾好，但...橙就暫時拜托你啦。」

「傻啦，我好鍾意佢，佢都鍾意我多過鍾意你！」晴笑著說，「無論點都好，我同橙都會等你返屋企。就好似等老竇咁。」



「我唔係你老竇喎。」

「當然唔係啦，我18歲㗎啦，瞓覺之前唔會再想老竇錫我額頭。」她臉紅紅說，我明白她的意思，笑了起來。

「唔准笑我呀！」她說，把身轉到靠牆那一面。

我從椅子上站起來，稍為用力把床上的她從另一面移回來，她在床上又害羞又有點生氣的看着上方的我。

我靠近她的頭，聽到她急促的呼吸聲，然後輕輕的親吻她的額頭，她馬上臉紅的別過臉去，呼氣的聲音變得更急。

「係唔係咁？」我重新坐在床邊的椅子上。

「唔知啊！」她又面向牆的躺著。

「傻。」

靜下來後，她又把身轉回向我的那一邊，輕搖着我倚在床邊的手臂，想我躺在旁邊陪她。我在她那狹小的單人床上輕抱著她，她把臉緊貼著我的胸口，我再一次輕親她的額角，她便慢慢睡著了。

我看看手腕上的Fossils手錶，已經凌晨三時，也沒有要回去的念頭，便抱緊晴，輕閉上眼稍為休息，靜待破曉的來臨。