【穿越】【三國】 流離者(不定期更新): 11
我們被邀請到丁原府中暫住,丁原還命人侍候我們梳洗(有人服侍原來都真係幾爽,不過沖涼個時有人又有少少老懢...),之後各分配一間單人房間。
我住嗰間(小房間)都比我整間廉租屋大得多,裝飾到勁古色古香...啊唔係,係好普通先啱,而且將床仲......
「起身啦!夠鐘返學啦!你係咪想死啊!」一把十分熟識的女性聲音在吼叫着。
「比我訓多陣啦,都未夠鐘......」我一如既往的答覆。
「你幾時有超能力㗎?唔洗睇都知幾點!」一如既往的冷嘲熱諷。
「我今日真係好攰啊,哩世人都未試過行山行幾日,仲要見倒勁多核突嘢,你今次就放過我啦,阿媽!」
阿媽?
「阿媽!」
「撞鬼你咩!咁鬼大聲,又語無倫次,做乜鬼嘢啫你!」
我以一個擁抱表達那難以言諭的喜悅。
「何方妖孽,急急如律令!你一定唔係我個仔,你做咩咁犯賤好上唔上,上我個仔身。」
我阿媽雖然粗聲粗氣,但係又鬼咁搞笑。
「邊度有鬼,等我用精靈球收咗佢。」一個中年男人手持智能電話對着我說道。
中咩年男人,傻嘅都知佢係我老豆啦,又慘在我老豆真係傻嘅,有時真係唔知佢真傻定假傻。
「哥哥!」一個小巧可愛的小孩向我衝過來。
「阿妹!」我身體不由得的後傾。
「喺邊道啊隻鬼?喺邊道啊?」她開始在我身上任意搜索。
「老豆,要收就收咗你個女先啦!」
你唔好睇我個妹咁啊,佢智商成169㗎,但係硬係鐘意埋啲古靈精怪嘢,連買隻公仔都要面目全非先鐘意......,P.S.做天才屋企人堅慘,有時佢講咩你又唔明,問你嘢又答唔到,仲要串你冇得駁,係㗎啦,玩曬㗎啦,但係你咬佢食呀!
我成家根本就係愛登氏家庭,佢哋唯一共通點就係鍾意串我,但係其實我有佢地做我屋企人真係好幸福。
之前的事情原來只係場夢,咁就最好不過,我食夠個啲冇味嘅包同埋乾曬嘅飯,仲要冇得沖涼,最慘係去完廁所乜嘢都冇得俾你抹,我受夠啦!
「咯!咯!咯!」
我的家人無視我心中的吶喊,突然叩起飯桌來。
唔通!!!
咪啊你,
拿,拿,拿
唔好啊,
「李先生......李先生,老爺邀請先生共用午膳。」一把含蓄而嬌美的聲音傳入耳中。
「唉~~!邊個呀!」我邊走出房門邊怒吼着。
本應回到家人們懷抱的我,卻被狠狠的抽出來,縱使聲音微弱悅耳,亦不足以平息我的憤怒。
「對...對唔住,李...李大人,請息...怒...」房門一開,只見一個少女整個跌坐在地,語帶顫抖的說道。
少女的淚水已從眼角中掙脫了出來,在其泛紅的臉頰上滑行。
仔細看一下那少女,身材嬌小,五官端正,皮膚白裡透紅,雖算不上絕色美女,但在下人衣裝中卻滲出脫俗的仙氣。
而這個仙氣滿溢的少女卻被弄得驚惶失色,但恐懼的神色不但沒有扭曲她那端正的五官,反而更顯得我見猶憐。
「唔洗驚喎,以身相許未得!」衝口而出的一句大台對白從我口中跳出,再擺出那淫邪的笑臉,可謂卑鄙無恥。
「哇~~~!」少女頓時大哭一場。
「......」一時得意忘形說出的話,令少女大哭如此,使我無言以對。
叫咗你唔好睇CCTVB㗎啦,又唔聽,搞到人哋喊曬咁點搞先!
「我講笑㗎咋,對唔住啊,唔好喊啦。」我拍着女孩的肩膀的安慰道。
豈料女孩哭聲更變本加厲。
係喎唔記得咗男女授受不親添。
「小南,係咪有人恰你?」丁雲玉聞聲而來。
shit,點解係要俾佢聽到㗎!
「冇...啊,李先...生佢冇出言調...戲我,都冇...摸到我...」小南說罷又繼續飲泣。
你係咪特登㗎,不過硬係覺得古代啲女純品啲,但係唔理佢係心機女,怕醜妹定係好天真好傻都好,呢鑊都係賴曬嘢...
「吓!佢又調戲你又摸你?」
「你個死淫賊!見到你個樣就知你係禽獸都不如㗎啦,等我話俾父親大人知,等佢毒啞你再斬你隻手落嚟,睇下你點死!」丁雲玉用他那可愛聲線說出一大堆腹黑毒舌的說話。
雖然我衰多口係抵死,但係諗落之前侍候我沖涼嗰兩個丫鬟又睇又摸咁佢哋咪應該做埋我妾氏......
「小姐真真...係咩事都冇呀...」那少女面有難色的道。
「等等先!我係口臭,但係冇心㗎!仲有我唔係摸佢,我只係想安慰佢咋,真係冇心㗎!」我既內疚又害怕的解釋著。
少女亦連忙點頭,但那淚留滿面,深蹲抱膝的模樣實在毫無說服力。
「小姐!你做咩對人客咁冇禮貌!」趙文責備道。
「趙叔叔啊!佢輕薄小南呀!殺咗佢啦!」丁雲玉指着我說道。
趙文眼神轉而投向我身上
「李大人,你咁樣又真係於禮不合喎!」雖然趙文語氣平淡,但卻有種說不出的威嚴。
「趙生你誤會啦,我咩都冇做!」我今次死梗啦......
「乖女做咩咁嘈啊...」丁原亦急步趕至。
「爹爹呀!個淫賊輕薄小南呀!」丁雲玉再一次加重語氣說道。
丁原慢慢回頭。
哩獲真係死啦,佢哋認定我係採花賊咁,古時殺人要填命,咁......
我究竟會點呀!!!!!
終於我陷入茫茫前境的猜想之時,丁原已經回頭看着我。
而其面容與我的猜想卻是天淵之別。
熱烈的眼神,再加上猥褻的面容,就恰如對着我說「英雄所見略同」。
趙文也看到丁原的眼神,彷彿看破一切就說道「而家小南仲係我哋嘅人,真係於禮不合,不過如果小南今晚好好侍奉李大人之後,咁就你嘅人啦!」
「哈哈哈哈!啱啊,啱啊!咁就咩禮都合曬啦!就當係多謝你沿路保護我個寶貝女啦!」丁原放出豪邁笑聲。
「爹爹啊!你點可以咁㗎!咁就送咗小南出去!」丁雲玉不滿的說道。
「唔好咁啦,最多我遲啲帶你去山林狩獵啦!乖啦,而家一齊去咗大廳食飯先啦!」丁原連忙放輕聲量安撫丁雲玉。
「好嘢!爹爹你話㗎!要講得出做得到呀!」丁雲玉頓時心花怒放,邊跑邊跳的跟着丁原走去。
「係啦~係啦~,李少俠你都一齊嚟啦!」
……..
雖然由我講好似有啲問題......
但係小南呢!
點樣呀!佢唔係我嘅人唔掂得,就要佢服侍我變做我嘅人,呢條數真係愛因思坦都計唔掂呀!仲有個死靚妹,轉頭就唔記得咗佢,咩事啊!
我急忙上前安慰小南,慣性的拍一拍小南肩膊說道「我諗丁大人講笑嘅姐,我幫你同佢講!」
出於好心的安慰卻起了反效果。
只見小南全身僵硬顫抖,低下頭收起哭聲。
這顯然不是安心下來
而是不敢反抗。
看到她這樣反應,我的心不禁刺痛起來。
我只好默默離去,
要不只會令小南更加痛苦。
去到大廳,大家都已各就其位,已經聊得興起,我看到廳中尾席,默默坐下,彷彿有沒有的存在都沒分別,都是,一塊磚瓦的脫落絕不會影響到大屋,更何況是隣家的磚瓦,更不會找到適當的位置。
此時突然高聲說道「丁大人,幾時可以一比武藝?」
「隨時!」丁原立馬應道。
「兩位且慢,來日方長,比武隨時都可以,但係各位多日奔波勞碌,當然要養精蓄銳先再一決雌雄,而且我哋都要先盡一盡地主之誼,帶各位參觀一下弊舍先岩。」一套十分官腔嘅說話,表面要帶我們參觀,實質上要炫耀威壓。
果不其然,午膳過後就先帶我們到練兵營,而且其士卒訓練得井井有條,而且個個魁梧健碩,確實壯觀,之後再遊逛一下這座「巔峰之都」,亦非常宏偉。
但最壯麗的不過於是城頂俯瞰下去那壯觀的境色。
雖然境色怡人,但這巔峰之都建於山上,一步一階梯,我這都市人雖然經過連日來的磨練,但都累得雙腳發軟,一回到房間便倒頭大睡。
「咯咯咯!」
又咯咯咯?