風之軌跡（校園，戀愛，籃球）: 請問你鐘唔鐘意籃球？上

「Nash 帶波摌入禁區，佢會唔會上籃呢」
「佢一手傳番出去三分線後，得分後衛一個三分，又一個助攻啦」電視上嘅球評說道。

起細個果陣時，我都會記得呢一幕。華麗嘅球風，就好似風一樣嘅切入，唔需要望人都傳到波，佢係我童年嘅偶像。

我叫阿健，一直讀書唔勁，讀band3學校。
細細個就鐘意籃球，好彩都有米8身高，算可以打到我偶像打嘅控球後衛（pg)身高啦。


但係唔知邊個腳頭咁好，讀第一年學校就同我地講過幾年就殺校㗎，所以我地學校係唔會有校隊同課後活動。




聽到之後真係想講曬我筆生所學嘅粗口。


我一心想起學界打出名堂，你同我講沒得打。好彩過左4年之後真係殺左校，我就轉左去一間有籃球打嘅學校。估唔中五轉校呢一年，我嘅一生就改變........


鈴...鈴...鈴，我望向手機睇下幾點鐘。「哇！7點半，死火遲硬到。」我關左個手機閙鐘馬上9秒9跑去刷牙洗臉換衫。唔洗5分鐘衫到換埋，即刻跑落去坐車。天助我也，一落到去就有車，我又狗衝上車。


叮噹.....叮噹，時間啱啱好，8點鐘達陣。





「同學，個個都上曬去課室啦，重企到做咩呀」一個年約30幾歲黑黑實實嘅中年男人對我講。

我聽到之後都唔埋三七二十一又狗衝上去課室。

都唔知d樓層邊個設計，我上到五樓先發現佢d樓層同班級無關係，比佢fake到臭曬，咁我層層行啦。


點知行到最後先發現1樓就係，唔好比我知呢間學校嘅設計師係邊個，我實捉佢出黎狗頭閘事後。





我望一望手機原來已經8點20分，反正我第一次返嘅間學校，可以理直氣壯咁話搵唔到課室。

終於步入課室，一打開課室門口，全班嘅目光都集中係我身上。

老師見我第一次番就叫我是但搵個空位坐，身為一個毒撚嘅我當然搵個格黎無人嘅位坐啦，好彩重有一個連位兩個都無人。我一坐落去先發現中伏了，原來格黎係有人坐，有個袋起抬底。



叮噹...叮噹，第一堂上完。我前面果個男仔就向我自我介紹。

「我叫劉博仁，個個都叫我brian,我見你第一日返學，就開個番左5年學你問我答真人版啦，有咩都可以問㗎。」


同佢吹左兩下水，我就發現有個人企左係我格離。我眼尾望左一望，目測米六左右、黑色bob 頭，校服嘅剪裁都難以姐蓋佢豐滿嘅身材，加埋水汪汪嘅眼睛，我相信九成嘅男人都會當佢係女神。






我見佢一直望住我，我又唔係太好意思，我唯有鼓起勇氣咁問佢。

「請問你企起到做咩，你係咪坐起我格離位果個呀，阻到你唔好意思。」

講完之後我都怯左一怯，怕講錯野。點知佢好認真咁同我講。

「唔好意思，請問你鐘唔鐘意籃球呀」


我比佢嘅問題嚇親，宜家拍緊真人版灌籃高手呀，都唔知點覆佢好。