風之軌跡（校園，戀愛，籃球）: 約定

我地三個人同對手握手之後準備上台攞獎，好多人圍住我地三個人，場面相當熱鬧。正當我準備行上台攞獎果陣有人叫停左我。

「打得不錯，未來有機會再打一次呀」阿橋打住喊露對住我講，佢講完之後就轉頭行走左。

「黎啦，快d過黎啦。等你黎攞獎呀，再唔過黎唔分番錢比你呀」傻韋對住我邊揮手邊講

我繼續走上台，我從台下人群之中望見詩雅同阿晴。我對佢地揮手致意，無佢地我都企唔到上呢個台上面。

我地隊派左我去攞獎盃，我由主辦單位果到攞左個獎盃過黎，我地4個人攞完獎盃之後大家都流露住興奮嘅表情。





「估唔到我地都有贏到冠軍既一日，如果隊長起到就好」brian望一望獎盃有感而發咁講，我都係第一次見到brian咁。

「下次攞獎盃就係下年學界比賽，下年我地一定要贏，贏左就可以同隊長交代下啦」傻韋繼續佢嘅樂觀態度面對一切

「不好意思，可不可以幫你們隊伍拍個照片」主辦單位邀請我地影相留念

我地4個人企起中間，我硬係覺得少左d野咁。我望一望阿晴佢地，我終於知少左d咩。

「等一下，我們有隊友未上台」我用我小學生程度嘅普通話對主辦單位同觀眾講





我揮手叫阿晴佢地上台，一開始佢地都唔係唔想上黎，但係佢地身邊嘅觀眾神推鬼㧬下佢地三個都上左台。

「咁大整估呀，阿健」阿晴雙手叉腰鼓起泡腮對我講

「我講過㗎，我以後嘅所有奬盃都比曬你呀，咩NBA MVP呀 FMVP呀 季後賽冠軍呀都比曬你。呢一個係第一個。」我將獎盃遞到阿晴面前

「傻瓜，係都要整喊人」阿晴邊刷眼邊淚光邊對我講

「黎啦影啦」傻韋大叫我地過去影相





就係咁，我地幾個人就影左最後嘅大合照，下次詩雅就唔知仲起唔起到......

頒獎完左之後，人群都慢慢散去。打完今日地波之後都差唔多要番香港啦，我地都把握最後嘅時機去挽。

「你唔同我地一齊行呀」我問楓

「唔行啦，我仲有一半行程先環完島呀，你地去挽啦。」楓坐上佢嘅單車準備出發

「係喎！差d唔記得問你地咩學校㗎，遲d搵下你地。」楓從單車上面轉過黎對我地講

「我地鳳凰城中學，記得搵下我地呀」佢聽到之後坐番好個人繼續佢嘅環島之旅。

天都開始黑，所以我地起附近行下睇下有無晚餐食，之後決定搵左間燒肉食。我記得上次學界打輸比金州中學果陣都係食燒肉。今次都係一樣食燒肉，但係今次係為勝利而慶祝。

好快我地就食完野，野完野之後我地繼續起附近行下。經過一個大型日式百貨公司，我們決定行下買下手信番香港。





「好啦，買野都係分頭行啦」brian講完之後就同女朋友阿玲行開左

我地幾個無分開行，選擇五個人一齊由地下開始行。

「有間甜品店呀，好似好好食」阿晴望住間甜品店流曬口水

「我都好想食呀，我地行啦」詩雅拉住阿晴一齊行左入去食甜品，咁我地都只可以追上去一齊食。

我地五個人坐低，我突然見到熟悉嘅面孔坐起對面，坐起對面嘅就係阿橋同茉莉。阿橋佢面前有好多甜品起前面，佢一個人不斷食，反而茉莉只係靜靜睇住佢食。

「阿健，食甜品點可以唔專心㗎，放心啦我地已經幫你叫左啦」阿晴對我講

「你自己想食炸」我講





阿晴伸一伸脷，完全比我講中曬咁嘅款

「唔係呀，我記得你鍾意食草莓蛋糕，我地幫你叫左」詩雅講

我鍾意食草莓蛋糕？好似我次次都係叫草莓蛋糕所以比大家以為我鍾意食，實際上係回憶驅使我食草莓蛋糕。