《無啦啦多左幾個家姐同細妹Season 3》: 決定
二家姐走左有幾耐呢？好似已經有五年？由我中五到我而家大學畢業，係囉應該已經五年啦。
呢五年來，我地都無見過佢，見過佢既人就只有大家姐同Uncle，但佢地都對呢件事隻字不提。
就連二家姐最錫既Sarah都唔知道二家姐而家到底點樣，我地幾個細既基本上可以話係一無所知。
呢五年來，唯一得到同二家姐有關既野就只有佢每年聖誕寄返黎既禮物同明信片。
講起呢D禮物就真係唔知好嬲定好笑，我年年都只係收到盒朱古力，但Sarah佢地個個都鬼死咁大份，又衫又手袋，你話公平咩。
五年，一屆奧運多DD，又唔係話好耐，不過我地好似已經習慣左二家姐唔係度既日子咁。
佢間房仲係同以前一樣，乜野都無變。
變既，反而係我地。
五年過去，我地咁多個都已經過哂二十歲，食煙飲酒都夠哂秤有突，不過全部都無做哈哈。
學業方面，幸好既係我地五個係中五中六既時候有俾心機讀書，互相扶持，最後大家係公開試都叫考到個好成績，入到不同既大學。
而家大家都考哂Final Year既Final，就只有Yui佢仲要讀，因為Nursing要讀多一年。
不過其實呢個講法係唔多正確，Ellie同Anna都有計劃繼續讀上去。
Ellie呢兩年潛心係佢既細胞研究上，雖然暫時未有咩大進展，但已經組成左一個團隊，仲係李Uncle度拎左一筆資金，以一個二十歲出頭既女仔黎講可以話相當厲害了。
至於Anna呢…就令我有D頭痛了。
頭痛既原因，係佢偷偷地自己報左一個為期兩年既英國course，事前無同我地任何一個提起，直至佢confirm人地收左佢佢先講出黎，大家當時全部都嚇左一跳。
Sarah同Ellen即刻話做乜咁大件事唔同大家商量下先，但Anna就只係冷冷咁話呢D係佢自己既事，佢自己就可以決定，唔洗同其他人商量。
亦因為呢句，令到佢同Sarah，Ellen既關係變到好僵，見面都面左左咁。
後日Anna就要過英國，但佢三個關係都未見有改善既跡象，我呢個磨心亦只好採取行動，黎到Anna屋企。
呢幾年我已經可以自由進出佢屋企，甚至佢既工人會準備我專用既拖鞋。
我一路走到佢間房，見到佢好專心咁執緊兩箱行李，完全無feel到我黎左。
我就放輕腳步，坐係佢床上睇佢執行李，直至佢轉身拎野先俾佢發現我既存在。
Anna：「哦？幾時黎架你。」
我：「幾分鐘前咁囉，不過見你咁專心執行李咪廢事打斷你，但你見到我既反應出奇地平靜喎，正常應該會嚇親先係架？」
Anna：「因為我估到你會黎囉，都唔係得返好多時間，你應該想我同Sarah佢地和好先走。」
我：「厲害喎咁都估到，不過你放心啦，Sarah佢地個邊我會搞掂，我只係想你唔好嬲佢地啫。」
Anna：「我仲以為你會叫我唔好走添，不過我講明先我無嬲佢地，我只係…」
只係唔知應該點面對佢地幾個吖嘛…
我：「你決定左既野，我又點敢求你改變主意吖，而且如果係有餘地既話，你一開始就唔會瞞住我地自己一個決定哂所有野啦係咪先？」
Anna：「哈，呢幾年你真係聰明左唔少喎，難怪班大人開始打你主意，話唔定又會叫你去做七星添。」
我：「哎…七星就免了…反正最近呢兩年佢地既影響力都開始慢慢減退緊啦。其實點解你會突然想出國讀書既？好似無聽過你講原因，呢度得我同你兩個，可唔可以話我知？」
此話一出，Anna馬上停低，Pause左咁，郁都唔郁下。
見到咁，我都無追問，只係默默望住佢既身後。
過左一陣，佢嘆左一口氣，望住距離頗遠既天花板，打開金口。
Anna：「我想自己可以變得更叻更厲害，好似愛麗絲又或者…你二家姐咁。」
更叻，更厲害…？佢咁講係咩意思…？
正當我想再追問落去既時候，佢就繼續講落去。
Anna：「再過四年，你就要返入你Uncle公司幫手仲要身居要職，但你，甚至我地所有人到呢刻都無相關既經驗甚至係知識。如果我地就咁虛耗呢四年，可能係會過得好開心，但到時恐怕會跌得焦頭爛額啊。」
…我可以講乜…
我對眼又係度做乜…做乜咁熱既…喉嚨都好熱…
Anna：「傻仔，做乜喊啫…唔好喊啦…」
透過模糊既視野，我隱若見到佢放低手上既衫，行埋黎我度。
再過一刻，我就收到佢既擁抱。
「兩年啫好快就過，到時我返到黎一定可以幫到你同我Daddy手。」
「所以，等我。」
呢兩句說話直至送佢入禁區既時候都一直響徹我既腦海。
最後既最後，佢地五個都互相擁抱告別，場面可以話非常溫馨感人。
但唯獨我一個人標奇立異，企埋一邊。
我唔敢行過去，因為我知道，之所以會搞成咁都係因為我。
因為我太弱，太無用，Anna先要走，為左我去進修。
你話我又點有資格去歡送佢…？
我可以做既野，或者就只有一樣。
係送走Anna之後，我打左一個電話。
「喂，之前你地講個樣野，係咪認真架？」