《無啦啦多左幾個家姐同細妹Season 3》: 計劃
Sarah：「阿明呀…我知道你而家好唔開心，但都唔好成日匿係房入面啦…大家都好擔心你。」
我：「我無事，只係係度計緊D數啫。」
正如Sarah所言，係Anna離開左之後既兩日，我都一直匿係書房。
不過，我並唔係意志消沉，岩岩相反，我而家鬥志可以話相當旺盛。
既然Ellie，Anna，Yui佢地都咁有決心，我都一定要幹出一番事業先得。
只可惜呢兩日點計都好，我地團隊都係唔夠資金。
如果我夾多D的話，或者可以成事，但咁做的話可能會比佢地懷疑我既背景…
其實呢幾年來我都盡力隱藏自己既背景，乖乖地讀書過日子，對自己屋企盡可能都隻字不提。
咁講法雖然好似有少少自大，但我真係唔多想比自己同學朋友知道自己既身世，怕佢地會用奇怪既眼光睇我。
不過其實可能真係我諗多左，因為呢幾年佢地都對我好好，大家玩得好開心。
咁…算啦都係諗定一個理由，話問屋企人借？定係話借左財仔？
Sarah：「計緊數？計乜呀？咦…呢D係...」
原來就係我煩惱緊用乜理由既時候，Sarah已經悄悄無聲咁行左黎我旁邊，仲睇左我手上呢份野。
我：「啊，我打算同朋友夾份做下生意，研究緊大家夠唔夠資金啫。」
Sarah：「唔…所以結果係唔夠囉？見你圈住呢個數。」
我：「嗯，所以我諗緊好唔好自己再拎多D錢出黎，但我又怕…」
Sarah：「怕身份曝光？一開始就坦白咪唔會有呢個問題囉哈哈哈，自作自受啦！~」
「不過我有一個..eh唔係，有兩個好提議喎，應該可以幫你解決呢個難題。」
好提議？
一聽到佢話有好提議，我成個人都即時精神哂，靜待佢既「好提議」。
Sarah：「嗱，你咪有個慈善基金既，用匿名既方式資助咪得囉~」
我：「唔得啦呢個方法，班友一定會追問到底係邊個基金，最後都係會比佢地發現架。」
Sarah：「咁咪用第二個方法囉~叫大家姐係公司幫你，隨便set個青年創業支援計劃，再叫你班朋友申請，雖然咁係有D複雜，但咁你朋友應該就唔會咁易發現到既。」
咦…呢個可能得喎…不過可以的話今次我唔想要靠人地，想靠自己…
我：「或者我同大家姐傾下先，我始終都唔係好想用公司D錢，話哂都係自己搞生意…不過你呢個提議確實係正，抵讚！」
講完我就伸手去輕撫佢個塊白滑既臉蛋，但唔知點解佢好似唔多滿意，仲鼓埋泡腮。
最on9既係天真既我居然唔識死走去問佢做乜事…
我：「嗯？做乜嬲爆爆咁既？」
Sarah：「你仲好意思問既，幫你諗左個咁好既辦法，你係咁意摸下人地塊臉就算呀？」
呀呀呀，我知道啦，一時太專心，好似斯洛哥咁忘記左世俗既生存方式添。
我：「傻啦，我又點會唔識做吖，吊下你癮咋嘛~」
今次我就將原本放係佢臉上既手轉去佢下巴，仲稍微用左少少力，拉左佢埋黎。
拉佢埋黎要做乜？唔洗問都知啦三歲細路咩下家。
梗係錫佢啦。
兩個嘴唇碰撞左一陣之後，我地都自覺地分返開，仲含情默默咁望住對方。
我：「咁樣你又滿意未呀？」
Sarah：「麻麻地，不過算啦，今次收貨，快D去搵大家姐啦，佢岩岩返左黎，唔知一陣又會唔會要開會架。」
哦哦！真係天時地利人和！大家姐呢排咁忙都會咁岩係呢一個moment返黎屋企，一定係上天想我好好把握呢個機會！
係再一次多謝Sarah之後我就匆匆忙忙跑落大廳，睇下搵唔搵到大家姐。
果不其然，我係梳化搵到大家姐，佢好似好攰咁抱住自己對腳，卷埋一團咁訓係梳化上。
咁點算好呢，阻住佢休息好似唔多好…
就係呢個時候，我忽然聞到廚房方向傳來一陣香氣，轉身一睇就見到Yui捧住碟野行緊出黎。
Yui：「咦…？阿明你落左黎呀？係咪肚餓？洗唔洗我去煮D野比你？」
我：「哦唔洗啦，你應該都係岩岩返黎，快D去沖涼休息下啦，今日你好似…」
說話都未講完，就突然間有人從背後偷襲我，一野箍住我條腰。
呢個高度，呢種質感，九成係大家姐啦。明明頭先仲訓緊，居然又突然醒左都有既。
大家姐：「阿明~~~」
大家姐一邊叫我個名一邊不斷用塊臉捽我膊頭，令人難以適從。
幸好有Yui幫我用野食解圍，成功引開大家姐既注意力，佢先肯放開我。
呼，真係好險，各種意義上都好險。
之後我就同大家姐去左餐檯個邊，佢就密密食Yui準備既意大利飯，而我就一味係度睇。
一直睇住佢食，都唔知幾時開口好。
機會已經放左係眼前，但點樣去把握呢個機會反而成為一個難題。
Anna啊，求下你借D勇氣比而家既我啦。
我：「大家姐…我…」
大家姐：「嗯？你都想食呀，好呀過黎食啦，泳琦煮得…」
我：「唔係呀，我唔係想講呢樣野，我想…」
「我想…」
勇氣呀！比多D勇氣！！
「我想同朋友夾份搞生意，但資金方面有D問題，想大家姐你稍微幫一幫手。」
呼…總算講左出黎啦…
但大家姐既反應出乎意料既平靜，只係拎住隻匙羹望住我眨眨眼。
大家姐：「可以呀，有幹勁係好事，等我同…呀唔係，等我諗下可以點幫你先！你知啦，調動公司錢係有d麻煩同複雜，我過兩日再答你好無？」
我：「eh…其實唔係好需要用到公司既錢，不如我同你解釋下先？」
大家姐：「唔洗啦唔洗啦，我好攰吖有乜都係聽朝先講好無？我食飽啦~上去沖涼先！」
大家姐一講完就放低匙羹，匆匆忙忙走返上房，直頭好似想避開我咁。
不過…計劃算唔算成功左第一步呢？